Tongsan Weekly Journal

“…ki-itna, lung kituakna, ngaihsutna kibang…” (Phil. 2:2)

Archive for April, 2009

ZOMI CHRISTIAN FELLOWSHIP NORWAY

Posted by khampeek on 29/04/2009

Zomite i tuntunna ah i pau leh i haam mah tawh Pasian biakpiakna kilunggulh in Zomi Christian Fellowship ci in a gam zui-in i phuan khia ciat hi. A gam leh a mun zui ciatin a min kibatlohna zong om thei hi. Ei Norway ah zong Pasian thu(Kha) lamah i Zokam/Zopau tawh nuam tak leh lungtaii tak a Pasian i biak khopna ding i lunggulhnate Pasian in hong tangtun pih a hih manin Topa min i phat hi.

Hih bangin Zokam tawh biakpiakna i neih sawm ciangin i min ding ngaihsutna Meeting April 19,2009 (Sunday)ni in Sia Pum Za Chin Inn, Stavanger ah kinei a, a tam zaw Leitung mun tuamtuam ah a kinei ciat mah ahi Zomi Christian Fellowship Norway(ZCF Norway) min mah kikipsak thei ahih manin Pasian hong thukimpihna hi ci-in Pasian min i phat lailai hi. Tua banah ZCF Committee panmun kiteelna zong a nuai a bang in kinei thei hi. Hih ZCF Norway makaite Pasian in hong zatsak na ding thungetna ah phawk ciat ni.

2009 Kum Zomi Christian Fellowship Norway(ZCF Norway), Committee teng;

President – Rev. Pum Za Chin
Vice President – Pa Tun Mun Muang
Secretary – Sia Khampeek
Asst.Secretary – Pa Lian Sian Thang
Trasurer – Nu Lun Don Niang
Finance Secretary- Tg. Thuam Lian Uk
Auditor – Pa Kham Khaw Tuan

Advisors:
Pa Pum Za Mang
Pa Thang Za Mung

Advertisements

Posted in Tongsan | Leave a Comment »

THEIH HUAI “FLU” NATNA

Posted by khampeek on 29/04/2009

A ma sa pen flu pandemic hong pian lai(1918) in gam khat leh gam khat ki
kawm nang in Tenbaw(Ship) ki zan lai hi. Tua hun lain a ngawn in, hih flu
natna lei tung bup kha 2 sung in ki zel zo ci uh hi. Lei lu leh lei taw ni
khat thu in ki kawm theih na tu hun in, virus thak hong piang leh ki lawh
nang hong man lang mah mah lai ding hi.

Gam lian tampi te in tua hun hong tun khak leh ki gin kholh nang ci in
“Emergency preparedness plan” nei kim uh in, a gam mi khem peuh a ding in zatui(anti viral) a ki cing in a neih ban uh ah, vaccine a man lang pen in
bawl zawh nang zong ki gin sa in om uh hi. Tua virus thak in hong do sung
teng a , a si te kaih khop ding dan, a nung talai ta ding bang cih pan pih
ding cih bang ciang dong in ki kup kholh sa in nei khin phit phet uh hi.
Bang ciang Flu Virus thak hong piang ding?

Tu ni dong kua mah in a hun ding gen khol thei lo uh hi. A hih hang tu nai a
hong piang thak Bird flu leh Swine flu te I et ciang a lau huai virus thak
hong pian ang hong nai sem sem cih pen ki mu thei hi.
Mihing leh mihing ki lawh thei flu virus hong koi ci piang?
Mihing ta ding in a lau huai lo Bird flu pan, mihing khat leh khat a ki lawh
thei a lau huai mah mah flu virus thak nam 2 in hong piang thei hi.
1. Flu Pandemic masa pen (1918) Bird flu virus pan in dam dam in hong ki
khel in (progressive adaptation, mutation), a tawp na ciang mihing leh
mihing ki lawh thei , a gu khauh mah mah flu virus hong suak hi ci in um uh
hi.

2. A bei sa pandemic 2 na leh 3 na (1957&1968) te pen mihing te tung hong
tun theih nang bird/ak sung a om flu virus in Vokpi pumpi sung ah hong ki
puah pha in(reassortment) in, tua hong piang thak virus in mihing leh
mihing a ki lawh baih thei virus thak hong suak sak hi ci in ki um hi.
A lau huai pandemic flu virus hong pian nang bang teng ki sam?
Mihing ta ding a lau huai flu virus hong suah theih nang thu 3 ki sam hi.
1. Flu virus in a gu khuah mah mah ding ki sam (highly pathogenic)
2. Tua flu virus pen ki lawh baih mah mah ding (ability to transmit rapidly)
3. Mihing leh mihing ki lawh zo ding (ability to transmit human to human)
Tu lai tak a hong lang flu virus te in number 1 leh 2 te cin zo ta hi. A
thum na in hong cin ding bek in a ki sam lai suak hi.

Thangboi

Posted in Tongsan | Leave a Comment »

NGEINA IN MINAM KEM

Posted by khampeek on 29/04/2009

Leitung ah minam khempeuh in ngeina kinei ciat hi. Tua ngeina in
minam hihna(Identity) a lakkhia ahi hi. Minam khat le khat pen pau le
haam, nek le dawn kibatlohna sangin ngeina(Culture) kibatlohna tawh
haksatna le buaina om thei zaw hi. Ngeina i cih pen a zaipi khat hi
in, i gen khiat theih pak dingin i pu ipate khang pek pan hong pai
suksuk, i luah suksuk thu hi a, i biakna zong tawh a tonkhawm den ci
leng kikhiallo ding hi. I pu ipate ngeina i cihcih pen zong i
ngeina(Dawi biakna) hi in, Tapidaw i suah khit teh a kizangthei nawn
lo pawl khat a om hangin a kipaikhia theilo pawl khat mah om thei
veve hi. Gtn: I dawi biakna ah dawithoihna vante, aite,phuisamnate,
Ton le gal aih sa aihte etc.. kizang thei nawn lo suak hi. A hi
zongin sa kigawh, Tukzukhol, Itna ankuang umkhopna, i Zola sak, leh i
Zongeina puante tawh lasa khawm a Pasian a kiphat thei lua cihna hi.

I Zongeina tampite sung pan i thupi ngaihsut le i limzat mahmah
khat ahi Zongeina Khuado Pawi pen tuni ciang dong a munmun a gamgam
ah nopcitak i bawl thei ciat hi. A beisa hun a kineih zawh ngei loh a
khatveina Zomi bup Khuado Pawipi 2008, Kawlpi-ZBCM huang sungah
nasiatak i bawl zawh manin lungdam huai mahmah hi. Hih tungtang ah
kumpi lamte zong tawh kilawmtatna leh i minam ngeina hong theihpihna
hun khat hipah ahih manin, mailam ah i kalsuan zia ding zong tampi
nuamtuam pah ding hi mawk hi. Tua banah US pan Washington
Innkuan,Flrida,,UK,Norway,Denmar,Germany,Malaysia,Singapore,New
Delhi,Aizawl Zomi innkuante in zong a munmun ah i bawl zihziah manin
lungdam huai sem hi. Hih bangin i ngeinate i bawl ciangin inau i tate
khangsawnte a theisak kisuak bek tham loin, minam dangte lakah minam
kician ngeina kician anei i hihna a pulaklak suak hi hang. Ngeina in
minam kem ahih manin, i ngeina i thupitsak lai teng minam manthang
ngei lo ding hi hang.

Hih i Zongeina Khuado pawi i cih pen i pu pate in anlak khit a Topa
tungah Lungdamkohna uh hi in a thupi mahmah khat hi mawk hi. Tua manin
tuhun Zomi bupin zong Topa tungah lungdamkohna hunpi khat bangin i
neih zawh lai ding thupi mahmah ding hi. I Kawlgam ah kumpite le minam
dangte in hong theihna pen Zomi namni bek hisak nawn loin i ngeina
taktak Khuado pawi tawh i lahkhiat zawh lai ding kisam mahmah hi. Zo
minam ni pen ngeina hi loin gam suahtakna ni suak mawk hi. Tua hi in
ngeina a awlmawh lo(thusimlo)te pen mi kician suak ngei lo ding a,
ngeina thei cian in a kemcing pa/nu pen minam kician leh minam
manthang ngei lo ding hi. Ngeina(Culture) in minam(Tribes) kem cing
hi.

Tukum a khatveina i Zongeina Zomibup Khuado Pawi 2008, Kawlpi in
leitung bup Zomite lungsim hong lawng mahmah ahih manin, mai kum ah
zong kipumkhat semsem in a thupi , a tangzai zaw a i bawl zawh na ding
Z-Zomite hanlung ciam Khangto diam… ci in Ngeina tawh i minam
kemcing ni.

Deihsakna tawh,

Tongsan Pu(Sia Khampeek)
Norway

Posted in Tongsan | Leave a Comment »

GENTHEIHNA PAN BANGCI SUAHTAK DING

Posted by khampeek on 27/04/2009

GENTHEIHNA PAN BANGCI SUAHTAK DING

Tu laitak leitungbup phialah sum bawl sum zuakna lam kiatsukna (Global Economic Crisis)hang in, Company lianpipite leh Sum kholna Bank lianpite in  buaina leh cihmawhna lianpi tuak uh hi. Leitung Kumpite leh Company nei mihaute in bangci leh phongto kik zo ding cih sun leh zanin buaipih mahmah uh hi.  Tua Financial Crisis hangin leitung gam tuamtuam ah  nasem mi tampi in, nasep tanlawh uh ahih manin, innkuan ciat leh kipawlna tuamtuam ciang dong  mabing/ giautau lawh hi hang.

Tua  bang kawm kalah i Zogam ah Mautam/ Zusa kialpi i thuak lailai a, Economic Crisis lamah cimawhna leh zawn khalna lianpi i phu kha sawnsawn hi.  Hih bang kiam sukna hangin  sum muhna  haksa lua mahmah a, vanman  nangawn a nini in khang ahih manin, annek tawm ding takpi a nei zo lo tampi ki om hi. A hang pen vanman a khan hangin,nasemte thaman lah khang tuan lo ahih manin, nikhat a mikhat nasep thaman in nikhat nek ding kingah zo lo cihna hi. Mihing khatin innkuan bup kivaak sawnsawn hi. Tua bang haksatna lianpi sungah sum nei zaw deuhte  phadawm in a nei lote gentheih lua mahmah hi.

Zogamah Zusa hangin lo pan bang mah kingah lo ahih manin, i kitodelhna ding sumbul muhna (Resources Products)  om lo hi. Tua hi leh bangcih ding i hiam? Tuhun thak tawh kituak pilna leh geelsiamna kisam cih ngaihsut huai ding hi. Lokhawh siamna, sum muh dan siamna leh nasep siamna limlim kisam ta hi.  Hih  nasep siamna nei leng Gamdangte leh Company tuamtuamte in honmg lei theih dingin  i Zogam pan(Resoures Products) i muh khiat theih ding kisam hi.  Bang hang hiam cih leh Zogamah  Gtn: Apple, Lingmaw, Caffee, Lenggah, Mehthuk, Gual khadi,Aluu,mehteh mehgah tuamtuam leh Singkung paak, etc..kingah zihziah hi. Kawlgam ,Zogam ah mipite nuntakna bulpi (Civil Society)pen antang mah hi pen hi.

Tua hi leh hih gentheihna pan suahtakna dingin,i mihaute in a  Companyte leh sum lawhnate pan ei leh ei kideihsak,/nasep kiguan ding kisam hi., Ei leh ei kiangvan loin midangte i sepsak manin i mipihte in sum muhna nei lo a, genthei semsem uh hi.  Cihnopna ah ei le ei kisemsak leng ei sung mahah i mihaute sum hong lut kik ding a, mimal, innkuan leh pawlpi ciatin kiphattuam pih ding cihna hi. Tua banah Sumbuk vanzuaknate ah ei le ei sungah vanman a nini in i khangsak zawsop a, ei leh ei mah i kinetum ta zen hi. Mipite lam pan zong midangte sai peuhah i lei nuam sese zel zong poi mahmah hi. Midangte kiangah sum piapah(Payment System) i zang a, ei le ei sungah a batin i lei sese zel hi.  Tuia manin sum buk nei pa  a batin a vanteng bei  bek tham loin a sum bul(Capital) nangawng bei-in zawn lawh hi.

Tua banah mipite in, nasep nei lohna leh sum bul(Capital) tawm /neih lohna peuh tawh tut mawk ding hi loin, khut siamna khat peuhpeuh a hun zui a zonsiam ding kisam hi. Tha nuamte leh  Khut siamte in nek ngawllo uh hi. LST sungah  Paul in, “Thadahte in anne kei ta hen” ci hi. Sepnop leh sepnop loh cih bang khawng om sak loh ding kisam hi. Nasepna zum huai lo a, naseplohna zumhuai zaw lai hi. Gentehna in, lasa siam, phuak siam leh tumging siam khatin  a mawkna tawh  lasa sa mawk lo a,  sum ngah zawhna ding ciang hanciam huai  hi. Tua mah bangin, Lai gelh, leh laibu lawmte in zong Zolai tawh bu 1000  na bawl a zuak haksat leh Kawllai in bu 1000 bawl zo leh manlang tak kikhawng pah ziau ding cihna hi.  Nasep siamna leh sum zuak sum bawl siamna tawh zawnna leh haksatna pan kisuakta thei ahi hi. Pasian hong piak siamnate (Talent) zang siam/ meet bawl siam leng Pasian zong lungkim in , gilpi lah kivaak zo ding a, zawnna pan kisuakta ding ahi hi.

Zomite sungah a mawkna tawh ngah ding bek kingaihsun hi. Tua pen nam neu lungsim leh zawn namneu lungsim taktak ahi hi. India gam a om Mivom Punjabi te pen khutdawh ngen om lo ci in kigen ngei hi. A hang pen Panjabi mihaute in amau sungah Company/ Society nei uh a,mizawngte laptohna dingin sumbul (Capital) leitawi pia in pantah uh kici hi. A sum leitawite uh nihvei thumvei dong leitawi  zo lai uh ci hi. Tua hih manin  nuntak na ah cimawh lua  tam lo uh hi. Hih pen ei Zomi Khristiante neih ding ahi LST hong hilh kihuh kipanpih tuahna(Social Gospel) taktak ahi hi. Gamtatna om lo upna in a si hi(Action is louder than Word). Ei pawlin bel a thu bekin i gengen a, a taktak sep i sawm kei zel hi.

Tua hi in zawnna leh i gentheihna a tawm zawkna dingin mihaute in Company,Industry leh Agriculture Farm cihte  hong bawl siam leh i minam sungah sum lut hong om ding a, mipi-mizawng mi gentheite in zong nasep gina nei in phattuam pih ding uh hi.  Nasep dan i siam kei leh  a zawngte zawng semsem ding a, a haute hau semsem in , a nesim siamte leh a kipeisiamte bek nungta ding ahi hi. Mizawngte genthei semsem ding a, midiktat lote leh zuau gente peuh hau semsem ding  cih hong suak ding  hi. Tua manin ei le ei kipawl siamnaleh kidomtoh siamna tawh  zawnna leh gentheihna beisak sawm ta ding hi hang.

Pasian in Zomi te a zawng khal leh a cimawh genthei den ding hong deih het lo ding hi. Tuhun thak ah Pasian in i makaite mit hong honsak  in, minam kipumkhatna ding leh minam kidomsanna dingin Leitunbup Zomi Kipawlna hong pankhia sak ngawngaw hi.  Hih kipawlna in  a lungdamte lungdampih, a pahtawihuai te pahtawi siam, a niam mite laptohna tawh minam sungah Zawnna leh kineumuhnate beisak ding cih zong kihel ding hi.  Tua ahih manin hunthak sungah  nasep siamna, ei leh ei kideihsakna,leh kihuhtuahna te tawh  Zomite i zawnna leh gentheihnate pan i suakta thei ding hi. Tua hun ciang bekin Thupha ngah minam  i kici thei pan ding hi.  Laisim mimal kim Zawnna leh gentheihna pan a suakta zo dingin Pasian in hong makaih hen. Pasian in Zomite thupha pia lailai hen.

Minam deihsakna kiu khat pan,

Sia Khampeek
Tongsan Pu

Posted in Articles | Tagged: , , | Leave a Comment »

PASIAN ZAT MINAM

Posted by khampeek on 27/04/2009

PASIAN ZAT MINAM

Zomite Khristian i suah zawh kum 100 val ta a, Cope topa in Tedim mite lai hong bawlsak zawh Kum 100 cinna mai 2010 ciangin a bawl sawm hi hang cih nungin kong gelh khin hi. Cope topa pen Sangmang i cih theihna ding Kha lam thu(Christ Gospel) leh Ci le sa lungdamna or khantohna(Social Gospel) a kici Lai nasep hong patsak ahih man ahi hi. Zonet sungah tulaitak bangin minam veii zaw ding i kidem ngeingai a, i min nung ah ZO laimal nangawn i koih nuam ciat hi. Minam veii leh a it masa taktak pen Cope topa mah hi pah hi. Minam kician khat hihna dingin pau athupit zahkhat in Lai a thupi zaw lailai ahi hi. Lai pen pilna ding bek hi loin minam kepcingna ding a thupi pen ahi hi. Kamdang khat in genleng Lai thei/ mipilte mah Pasian in zang hamtang nuamin lai thei mipilte mah picing zaw hamtang uh hi. hi. Pasian in mi a zatnop ciangin a muan huai leh a picin masak ding deihna tawh tat thapai masa den hi.

Tuhun i minam sungah minam it te khawng a Khami vai lo bangin a mu ki om mawkmawk hi. Minam na it limlim leh minam a bawl Pasian a it taktak na hipah hi. Moses pen Pasian a zatna dingin, a masa penpen apilna siamnate sangin, a veiina leh itna mah thupisa zaw lai hi. Tua bang i cih teh Moses pen pilna nei lo hi lo a, Faro inn sungah Egypt pilna hun sawt sim mah a sin khin ahi hi. Cihnopna ah minam itna nei in, ei a mite zong i ki-it ciang bekin Pasian zat minam kisuak thei pan cihna hi. kamdang khat in gen leng kipumkhatna leh kipawlkhop siamna i neih ciangin Pasian Zat MInam kici thei cihna hi.Tuhun i minam nasepna ah Pasian nasemte in pawlpi ciat ah mi kihau pen ahih manin,i Pulpit tung pan itna thu i gengen pen minam itna mah a gengen i hih lam phawk den ding kisam hi. Zomi ka hi hi i cih taktak leh Z-Zeisu leh Z-Zomi pen kikhen thei lo ding cihna zong ahi hi. Gam khangto te ah Pasian nasemte mahin mipite nam itna lungsim guan thei uh a, a sepkhiatna lam ah bel Biakna leh Nam vai a tuamin sem lel uh hi.

Tua hi-in Zomite thupha ngah minam ci in kambem dimin i gen ciat mah hi.Thupha ngah minam leh Pasian zat minam i suah theihna dingin, Pilna, siamna banah a thupi pen khat minam veii/itna nei photphot a, i kipumkhat ding a kisam pen ahi hi. Tua bang a kipumkhatna a khanna dingin kithumanna leh makaihsiamna zong kisam hi. Zomite pen a kilangpan, a kikhen tham ding minam i hih het kei hi. Zomite pen a kipawl thei lote i hi kei a, a kipawlkhop a siam nai lo bek i hi hi. Minam a ding na lianpi i sep sawmna ah kipumkhatna kisam a, kipumkhatna mun ah lawhcinna om thei bek ahi hi. Tua bang a i kalsuan ciangin i minam in Thupha ngah minam leh Pasian zat minam i suak thei pan ding hi. Z- Zeisu leh Z-Zomi a gawm khawm tawntung minam i hih ciangin, PASIAN ZAT MINAM i suak ding hi. Laisim mimal Topan hong makaih suak lai hen…

Minam itna kiu khat pan,

Sia Khampeek

Tongsan Pu

Posted in Articles | Tagged: , , | Leave a Comment »