Tongsan Weekly Journal

“…ki-itna, lung kituakna, ngaihsutna kibang…” (Phil. 2:2)

Archive for the ‘Articles’ Category

Editor’s Blog

HAUSA ZIAK IN KUANGZAWN BAN (By- Daniel Mangpu)

Posted by khampeek on 27/07/2009

HAUSA ZIAKIN KUANGZAWN BAAN

‘I Zawnin honghai sak’ cih taanglai Pu ten kamciin ana
neih mah bangun, khat veivei I lungsim sungah I sawmloh pikhat kiseem
khathei a, I ngimloh loh khat kipau khathei hi. I lungsim a omloh
na-ah I pumpi om khathei hi.
Mihau thuthei te panpih ni
Ei sanga anei zaw peuh amawhna ding zongin, tuahang hi,
tuahang hi peuh cithei hihang. A tuacih ha’ng zumah khia leng kiman
lel inteh peuh cimawkmawk hihang. I khuasung ah anei pian khat omleh
tuate Pheisam siam’ hi, Sumbawl haupian khat omleh aman vankham pua
hiven ci a I elbawl hang amau neihsa lah kiam tuanlo, ei a lah
khanglo, aneite mahin tu tadih anei hiphot hi. Tua ahih manin ei Zomi
sungah tuadan gamtat kampau zat nawnloh ding thupi kasa mahmah hi. Ei
khua eiveng sunga thupiang pen ei mahin geenkhia kei leng athei ding
omlo hi. Ki el bawl kilang bawl a igamtat leh kuama phawk lohin eiteng
mah gim kipia-in I zawn lawhlel ding hi.
I theihloh kalin mihau te hangin I gam sung I khua
sungah khantohna noptuamna tampi hongom ahihlam I phawk gige ding
kisam hi. Nidang 1965 kimpawlin Kawlpi pan anntang khe mahtawh kipua
1970 kimpawl ciang R.T.C mawtaw, 1990 hun ciangin I Zomi mihau te’
tungtawnin mawtaw hoihno (Maanlung) tawh guahzu taleh phamawh salo
nisa lehlah phamawh salo in mawtaw I tuang theita hi. Anei zawdeuh
pawl khatin a gamla pan singhoih nono mawtaw tawh ava puak uhciang, ei
aneilo ten khuanai zawdeuh a singteng tom thei in, guahtui zong
hongtam zawdeuh hi.
Mihau ten taihinn honglamin ei aneilo zawdeuh ten amau
deihloh singpek tetawh inn lamthei hihang. I vekin Taihinn vive bang
alam zo hileng sing kiphuuk lo zawdeuh dinga, guahtui hongmaan ding
hi. I tui-mei(electric) honghoih in mei vive tawh annhuan zoleng
singkung hongtam ciang, guahtui hongtam dinga, I khawhsa khamin i
nuntak hongnuam ding hi. I gamah singkung mahmah zong omlo keu
ngimngiam pen guahzuk nading thu I ngetnget hang’ a zusak ding Pa’
ading zong haksa kha veve dingin ka um hi. Tuazong hauhna panmah a
hong kizom thei thu hi.
Tuhun ciang thuzong kikhualto seemseem in ikhua mihau ten
ikhua ah khuapi te mahtawh kibangin van hongzuak uhciang I khuazang in
kinop tuam mahmah hi, gim pipi van puak kul nawnlo, nikhat I thabei
dingpen zingkhat in kiman thei hi. Mihau te’ hangmah hi.
Mi pil misiamte lamsang ni. Mi pawlkhatin amau sang apil zaw te geensia nuam uh hi.
Pasian naseem pawlkhat bang…..khuaneu khawngah vapai in tentan vapia in….bangci thei hiam cihleh… “hih kalim gialh(suaih) teng na en
toto leucin gamdang pai a Doctor tenzong hiteng mah asin hilel ai ve”
peuh ci-in va thuhilh gawp thei hi. Tuhun ciang Doctor zong tamin,
Doctor ihi a, ihi kei zongin mipi ten koihna (ciaptehna) khat hongnei
gige hilel hi. I gam sungah ki elel tawh khantohna hongpiang hetlo
ding, kilapsang hun hita hi. I gamsungah I theih ngeiloh pilna ciimna
tampi zong gamdang pilna sinten hongpuak ahihlam I mangngilh lohding
kisam hi. Iraq kumpi pa bang kipha sakin azawh lohpi American te
elbawl ahih manin amah ki gawlgui khai a, agam in tuni dong gal thuak
lawh hi.
Ki pahtawi ni.
‘Ei hong kipahtawi leh nuam mahmah napi hangin banghang en mi
pahtawi theilo se…Ei hong kilap saangding ut napi hangin banghang en
mi laamsang theilo’ihiam ki ngaihsun phani. Ei pen lampi ah kituak leng Hei! peuh kici in kisam mawk
hihang Midangte kipah tawi in lampi ah kituak le uh, mihaunu, mihaupa,
mipil pa, mihoih nu ci-in kisam lel uh hi. A heh kimlai zong kinui
hieuhiau zo hi. Sum beilo a lungnop kipiak na khat hi.
I theihloh kalin mihau mipil te hangin igamsung I khuasung ah
phattuamna tampi om a, I muhtang zong om a, I theihloh kalin I neek
pihpih zong om hi. I muh nailoh zong tampi mah omlai hi. Kidem bawl ki
elbawl ki zuakzuak, ki khiatkhiat tawh Zomite khangto loding hihang.
Asem tenzong hoih tak sem in, i panpih theihna te-ah kipan pih
in,kihuhin aki pahtawi siam Zominam te hini…Hausa ziakin kuangzawn
abat lam mangngilh keini. ———–“”———

Advertisements

Posted in Articles | Leave a Comment »

MINAM KHAT LAI KHAT

Posted by khampeek on 15/07/2009

MINAM KHAT LAI KHAT
By-Daniel Mangpu,
Minam khat a i om ciangin lai i neih kul a, lainei minam khat pen minam kip kici thei pan hi. Tua mah bangin minam khat in lai ahoih a bawlkikna/puahna nam tuamtuam nei mah taleh lai namkhat bek nei hi. Tua hi-in miman khat lai khat cih thulu tawh hih a nuai a thu thum i kikum ding hi.

1. LST bu/ labu te tuam tei kikkik nawn keini.

Nidang 1980 hunlai pawl ciangciang i Zomi sungah nopna dahna te-ah kua pawl kuapawl cilo-in Tedim labu ZBC tawh la kisa khawm thei hi. I ki pumkhatna zong kilang mahmah hi. LST sim lengzong tua sungah cih kik kik kul lo-in mipi in ki-en pah thei-in kitel pah hi. Tuhun ciangin i khantohna khat zong himah napi’n pawlkim ciah bangah ei ut banga mi’ phuahsa late/miteisa LST te ei ut banga amal laih a i tei kikkik ciangin, Zomi te tut khop khawlkhop na te-ah zong la kisa khawm thei nawnlo thuzong kigen khawm thei thei nawnlo zah dong kihi ta hi. A lungkham huai mahmah thukhat himawk hi. Kamphen akullo Zomi te sungah la nangawn isak khop theih loh pen a zumhuai mahmah thukhat himawk hi. La khawng pen en phuak leng i ut bangin amal kilaih thei a, a aw i ut bangin kibawl thei bek hi, mi’ phuah sa la khawng LST khawng i ut banga amal ilaih suk ilaih toh pen guta hihanga © copyright thutawh bang hileh thu hong kibawl thei thu himawk hi. I Lai Siangtho tei thak pawlkhat bangah hoih tak lungngai kik keileng akisim pak theilo pawlkhat bang om liang hi. Saklam a eimi ten amau kam zatdan leh alai zatdan uhtawh honggelh ciangin Zogam a om te ading leh Kawlgam a omte ading atel hak pawlkhat om mawk hi. Zogam lama ten tei lehzong Saklam ate’ tel hak om dingin ka um mawh hi. Tua ahih manin Saklam, khanglam Zogam leitung mun tuamtuam a omte ihi zong in kamphen kullo minam khat sungah akibang akisim khawm thei akizang khawm thei laikhat neih ding kisam mahmah hi
.
2.Ei awkaih tawh laigelh nawn kei ni:
Malaysia gamah Zogam Laaizom laihawm kahawm lai-in ka lawmte khat kiangah “kei laihawm kipan taning ei kipawl ni ei” kacih leh kalawm pa in bang hong ci hiam cihleh…. “lawm Mang aw, hih nalai hawm pen ei khuaveng teng thu kizak nakhatin hawmni….” hongci ngei hi. Ken nabangci dawnkik kahiam cihleh…… ” Lawm Pau aw nadeihna tel mah ing, ahi zongin hi gamah ei kamphen kullo Zomi te ading laihawm kician zong omnailo a, zong a kisam mahmah thukhat hi a, asum lampan zong enleng hih kamphen kullo Zomi khempeuh huama lai ihawm zong ilai hawmna a beizah ingah kik nading haksa hiven, ei khuaveng teng bek hawm leng abeiteng mikhat in isik den keii kul ding hi…. Ei Zomi bup genloh Seen(Chinese) mibup bang huam zoleng sumzat dan hongnuam panding, zum kineizo ding, van kinei zo ding hi… ” kana ci hi. Tua kawmkal ah i laihawmte i LST te ei awkaih tawh i gelh nop lailai ciangin ilai hawm midangte sim theihloh ding a ahawm ihi ta hi. Ei minam neuno khat lel ading/ ei khua khat lel ading i gelh ciang zong mi khempeuh i sim theih ding, i zatkhop kammal tawh i gelh ding kisam hi.
Cope topa in ei khuaneu khat lel ading, ei minam neu khat lel ading a hong phuahsak hilo a, ei kamphen kullo Zomi te’n izatkhop ding a hong bawlsak ahi hi. Tun en mi’ phuahsa kammal pen ei awkaih tawh i ut banga bawlkik kik in siam kisa mahmah lai cihpen ngaihsun theileng azum huai mahmah thukhat himawk hi. Seen(China) te zong leitung bup ah minam tam pen pawl hi a, minam neu neu Hockien, Hakka, Cantonese cih bangin kikhen tamah leh laikhat bek nei uh hi. Amau te kikhen nuam leh kikhen tak mahmah lel napi kikhenkhen i thupiit lohna namu khia uh hi. Exm-Malaysia gama senmi omte kikhen thang mangin hileh Malay kumpi ading uknop mahmah ding hinapi kipawl khawm a thu avai hawm uh pen Malay kumpi ading zahtak kul mawk a, amau ngahding a kilawm za leh munte piapah uh hi. Lai kihawm pawlkhat bang enleng thupi thei mahmahin leitung level tawh lai hawm hinapi ama awkaih tawh hong gelhciang namneu tawm khat bekin sim thei a, pam maih mahmah hi. “aw hilai te izatkhop lai/kam tawh gelh leh asim nuam tamtak in ciei ..” kana cici hi. Leitung laigelh mipil ten lai agelh uh ciangin amau laibek thamloh leitungbup i simtheih ding laitawh gelhin sumbei liangin paunam tampi in teikhia khia uh hi. En ei lai/ei awkaih bek tawh i gelhgelh lai teng pen mipilte nasep dan tawh a kilehbulh nasep asem i hi gige hi.
Tuamah bangin ei kamphen kullo Tedim kampau Zomite pen Lakhui bang i khum a, lai i hawm zongin a mi mahmah tawm lai ihih manin summet ngah ding genloh abei zah ngah kikna ding a hamsa mahmah thukhat himawk hi. Tua kawm kalah tanau pawl khatin leisak ding, thapia ding genloh mawk ngetnget lai mawkin summet ngahna ding peuh mah hi theilo hi. I tawm mahmmah lai dante pen lungngaih huai hi. Lawmte Lakhui khum khat a haksatna tawh a khuite khum beh zo nawnlo-in a cover leh sticker kibelh te honkhat om lai a, aki Zomi sak mahmah sai khatah ka va zuak hi… ” Pa Pau aw, nang zong hih lakhui te na teisim sak veve amah(lasa pa) nahuhna in hi te… abawlna zah mah in hong lei kik mai ve, amah na huhna zong hi……” ka cih leh bang hong ci kik hiam cih leh….. ” Tuate Ks 200 bang man hiven, ken copy(meihtu)ziau leng Ks 50 a dal li bang ngahkik thei hiveng …. deih keng ….” hong ci ziau mawk hi. Ei kamphen kullo Tedim kampau Zomi te pen Bawng khekhap sung a uiphuk bang hilel hang a, i kihuh kipanpih mahmah a, tha i kipiak mahmah kei leh adah huai mahmah thukhat hi mawk hi. Tua mah bangin lakhui khum dingte bang, honghuh khat a om kei leh a kikhum zolo himawk hi. Lakhui leh lai kihawmte mi leisa peuh simsak/ngaihsak ziau a, copy sak ziau a, aneite a ilei sak loh ciangin ei ading nuam mahmah napi abawl te’ ading na mahmah hi. Tua ahih manin i tawm mahmah lam ngaihsun in kipawlkhawm lo a, bangmah itangtun lohsang kipawl khawmin tangtun naciang khat ineih ding kisam ahih manin ei awkaih tawh sang izatkhop theih lai tawh gelh zaw ni.

3.Atamzaw lungkimna zangsiam ni.
Tuhun ciangin thukhen khat peuhpeuh ah atamzaw lungkimna zuihhun hita hi. Atam zaw lungkimna i mantheih keileh eikia atang kai ihi ta ding hi. I Zolai tawh kisai Zogam ah Lakam tawh laphuak siampen leh amin thang pen ahi Lengtong pauno bangin Malaysia Laaizom laihawm sungah ama deihdan Exm- Saatsan tungah Sa at zaw-in, laidal tungah laigelh zawleng….(Laaizom Vol.1, p/6) cih bangin maikhat dim in honggelh hi. Dr.Chin Khaw Khai, (Laaizom Vol.6,p/6) Dr.Thuam Khan Thang te-in zong copyright tawh kisai leh amau hoihsak dan Exm… mangkang ci nawnlo in mikangte cizaw leng, (Laaizom Vol.6,p/20) cih bangin Laaizom bu sung mahah hong gelh hi. Dr.Gin Khan Khual bangin a omna gamla mahmah taleh aminam leh agam hong vei mahmah in, lailam a kipan atuamtuam hongsem den hi. I siapa banga Gamdang tungsa mipil/mihau kitawm nawnlo napi’n agam alei avei ding Zomite kitawm mahmah lai hi. Pasian nasem pawlkhat bang migam nuamah omthei himah taleh agam leh aminam a itna tawh agam ah na hong sem ngiat tampi ki-om hi.
Dr.Gin En Cin, Sia Pau Tawng akipan mi tampi inzong ei deihsakna tek tawh ma kipang ciat hi. Mailam ah isia ten ahoih hoih in hong makaih ding a en ahoih lam ah zui toto ding hihang. Tuhun ciangin iki khenthang hun honghi nawnlo a, ikhantohna tawh kizui a ikigawmtuah hun honghi ta hi. Sum omlel tah cih bang peuhin tuam din langlang ding pen hong hoih nawnlo hi. Kamphen kullo Zomi tengbek in kipumkhat a, isim khop theih ding, izathkop theih ding laihoih khat ineih ding kisam mahmah hi. Leitung ah mitam pen a kiciamteh Seen leh India tezong tam lua kisa amau leh amau zong kithei zo nawnlo napi’n Seenmi India mi ahihna alai leh apau un kem in lakkhia lai bek hi. Amau ten muntuam tuam ah om taleh alaileh apau uh kem hi. Ei Zomi tepen Zogam pan Kawlpi, Yangon USA, England tungsuk leng, ipau peuh zumhuai sa, cihbangin kizang nuamlo se hi. Nu leh Pa pawlkhat in atate hilh hetlo lai mawk hi. Tuate pawlpen nidangciang Zolai Zopau thei apa te omnawn keileh minam tavai te hongsuak ding hi. Napau zum huai nasak leh nangmah azum huai mahmah nahih lam naki mangngilh ngilh kei in.
Minam it teleh mipil thu ngaihsun ten koikoi om taleh amau pau amau lai atate uh hilhin theisak tangtang uh hi. US itung a koi koi itung a ipu ipa khangin iteng a, Greencard tuamtuam ingah zongin isi isa pen Zomi mah nahi lai mawk a, imin nangawn mikangte’ sazian sungah lut taphiual mahleh naci nasa pen lut ngeilo ding hi. Greencard, I.c , Matpungten kilaih thei napi’n isisan kilaih thei lo hi. Tua ahih manin itaten ipau ilai leh i minam a theih nading, lai kician izatkhop theih ding khat kisam hi. Leitungah Kawlgam pen aneu penpawl hi a, minam akitam pen pawl hidingin ka um hi. Tua kawmkal ah nidanga Zomi icih sungpan Chin ci-in minam tampi takmah ki-om lailai hi. Akikhen ta’klo minamte hina pi hangin min deihtek in, mun deihtek in ihih ciangin kikhenloh hongphamawh ta hi. Kamphen kullo Zomi te nangawn ei awkaih peuhtawh kipan nuam a, eibawng peuhtawh iki hihsak nuam sese pen kiamsuk lam amanawh ihi hi. Banghun pawlteng hiam theikeng ikumpi ten Beh tawh kisai laite hongkan sak kikin i Beh i Phung kansan kikin ibuai khengkhang hi, (Tuazong Kawlkumpi ngian khatmah hidingin ka um mawh hi.) A lom lom a om buanlom pen khen ol mahmah a, akiman piatpuat akikhenlo a alom om buan pen khenhak mahmah hi.
Tuhun ciangin Zomite /hun hoih loh in muntuam tuam ah hong khenthang mangta hi… Nidangciang gamtuamtuam a om Zomite i pau leh ilai bek in hongkem / hongcing zo ding ahih manin minam khatin laikhat bek ineih ding kisam hamtang ni…. Topa’ thupha.

Posted in Articles | Leave a Comment »

ZOMI TE KHANG TANGTHU ATOM KANNA

Posted by khampeek on 14/07/2009

AD 1900 MALAM KHANGTHU ATOM A KANNA

By Kap Thang (Malaysia)

BC-2000 Hih hun lai-in ih pu ih pate Tibeto-Burman dangte tawh Sen gam, malsak lam Kansu khum, Lanchou khawpi kiang, Tao lui gei tengah teng dingin ki ummawh hi.

BC-1027-256 Sengamah Jo (Zo) vaihawm lai
BC- 221-207 Sengamah Chin vaihawm (Chin Empire) lai
BC-4 Kachin leh Zomite piankhiatna ih pu ih pate’ Kung-han Ch’iang’ (Chi-ang hiang khat)te, Sengam Szechean kiimah teng uh hi.
BC-1 Mekhong leh Yangtze luinak lamah teng uh hi. Pyu te’n kawlgamah Sri Ksetra khuapi saat. Zomi te’n Payayi khua na sat uh hi.
4 Zomite in Dangka (Taka) na na nei khin dingin ki ummawh hi.
6 Chindwin zanggam tengah na na teng uh hi. 108 Pagan (Pugam) Popa (Pupa) mual kiimah teng uh a, (Dahpa, Penglam’ te’ hun lai ahi hi.
600 Pyute Kawlmi suak; Kanyante ranyante Fakhine- mi suak; thet mite Chin (Zomi) Suak hi.
750 Zomite Minbu, Thayat, Aunglan (Myede)
1044 Zomite in Kabaw valley tung. Khampat khuat na sat uh (Khampat pen Zomite’ sat hi ding hi: Khampat khua in zang leh kham kipehna, kham kipatna ahih manin khampat a kici hi ding hi. Mualtung gam genna Kham a kici pen Zomite bek in ki nei hi: Hih kuam tengah hun sawtpi ki teng hi: 1084 Anawrahta in Sukte zo-in Kumpi lian masa na suak
1200-50 Kyansittha zi Kumpinu Thambula (Zomi) ahi hi.
1254 I pu ih pa te’n Khampat khua-ah mawng (bung) kung khat na suan uh a, tu dongin muh theih dingin Khampat khua nawlah omlai hi:
1250-300 Narathihapate zi Kumpinu Saw ( Zomi) ahi hi:
1355 Khamtung tung; Ciimnuai khua sat. Eimau’ sunga makaite-Songthu, Songza, Songkip, ahi uh hi:
1364 Leng Tong Hoih Ava mangpa’ zi, Zo minam hiang khat Maring’ mite Manipur gam tung dingin ki ummawh a, Vangteh (Amin masa Khumnuai) kisat ta kha ding hi.

1370 -AD Zomite Chindwin gunpang phaizangah Shante tawh teeng khawmin, Sagaing, Monywa, Dipeyin, Yinmarbin, Mintaingpin, Pale, Gangaw, Pauk, Htilin, Htilin, Ngape-ah teengin, Sibani khua-ah Zo Tualsong 15′ sang tu dong muh theih dingin om lai
1400 Khawhkhen, Kawlpi (Rajagya-Yesayo) tung
1450-700 Hih hunin Zo minam pawlkhatte Tripura gam tung dingin ki-ummawh hi. (Halam, Hrangkhawl, Darlong Kaipeng etc)Lushei Lentang leh Ciau kikal-ah na teng uh
1400-1500 Thang Ho leh Lian Do; Cing Khup leh Ngam Bawm; Gal Ngam leh Hangsaite Ciimnuai, Geeltui-ah na teng uh hi.
1500 1250-1900: Eimau beh Hausa, khuasat leh Ukpite makai-in ku-uk Lai kinei lo-in khang thu kiciaptehna om theilo;
1570 Zosuan ‘Anal’ te Manipur tung dingin ki ummawh
1600 Guite Pu Gui Mang in Tedim khua na sat hi;
1700 Lushei leh Paite mi te’n Ciau na kan ta uh hi.
1720-30 Alaungpaya kumpipa in Khamtung galkap la-in Syrian gam na sim hi.
1750-850 Thado-Kuki te Manipur gam tung khin uh hi; Biate mite in tua a Chachar mun tung khin dingin ki ummawh hi.
1775 Lai mite Mizo gam tung khin dingin ki ummawh hi
1777 Lushei mi te’n zawlbuk sawm nei dingin kipan khin
1800 Khamtung mite in Chittagong sim uh:

1813 Zahau leh Khuangli tawh kipawlin Kam Hau in Thahdo gam la-in uk, Taisunte (Falam ) in Lophei sim, Taisunte in Khuasak sim uh. Zahau leh Khuangli kisim, taisunte in Mualnuam sim. Hualngo leh sukte kisim uh hi.
1820 Rev. Adoniram Judson Kawlgam hong tung hi. Amah pen kawlgam Missionary masa pen hi.
1830-850 Hatlang Pu Mang Gin (Mangkua) Tedimah teng. Tedim gam sunga Hausa thahat leh minthang kuate in: Tedim – Mang Gin -HatlangVangteh – Pum Go – GuiteDimpi – El Thuam – NaulakSaizang – Vung Vial – HatzawKalzang – Sung Hang Thangnuai – Mang Sum – ThawmteKhuasak – Mat Tuang – GalphuakThuklai – Suan Thuk – SumniangLimkhai – Neih Tuang
1856 Tedim khuapi kiphut kik, Kam Hau in Mualbem pan Tedim zuan hi. Hausa Pu Kam Hau, Galvan- Pu Mang Gin, Thuzek- Pu Khoi Lam, Meitei galpi na zo uh hi.
1856-1859 Kam Hau leh Za Hau kikopin Manipur na uk uh hi.
1857 Sim leh mal kido hun ahi hi. (Mizoram)
1862 Tedim sim dingin Meitei galkap 1500 ong kuan suk uh, Meitei in lel, Zomi leh Meitei kido a khatveina hi.
1871 Mautam’ kial khatveina hong tung.
1872 Guite Innpipa Go Khaw Thang Meitei te’n man, 1872 in Phaipi thong inn sungah si hi.
1876 Vai Khan Khatveina, (Mangkang galkapte Lushei gamah a khatveina lut uh hi)
1884 Guite innpipa Pu Sum Kam leh Meitei Lengmangpa te’n kilemna bawl, Guite mi 2000 khawng in Lamka gam hong tung uh.
1886 Aksi kiat kum ( 3-11-1884
1887 Mangkang te’n Zogam ( Chin hills) sim kipan
1888 Capt. Raikes makaihna tawh mangkang galkapte Kawlpi tung, Vai khan nih veina, Mangkangte lushei gam lut nihveina ciah kik nawnlo uh hi.

1889 Capt. Raikes in Zogamah Mawtaw lamsial ding ngen, Zomite’n phal lo, Oct 17, 1929 sungin Zomite in Mangkangte 12 that, 122 hing mat, thau lawng 4 leh la 4 man khawm uh, Sihzang Kale gam sim uh. Taisun leh Sukte kipawlin Kawlzang sim. Kam Hau leh Sukte kipawlin Kangyi sim. Sihzang in Mangkang lambawlte suam. Zokhua, Khalkha, Sukte kipawlin Kumpi na do sawm uh, Taisun mi 1000 in Sihaung sim. Capt. George White in khamtung mite do nadingin India galkap Battalion khat leh Assam kooli 2000 ngenin na ngah hi.
1890 January 23 ni-in Sir Gorge White, General Faunce, Major Raikes thuamvum ong tung, Zogam do dingin kuan. Feb 4 ni-in Khuasak la, Feb 13 ni-in Saizang la, May 4 ni-in siallum kulhah kikap, Mangkang bu 3 leh galkap 83 si, Surgeon khat in V.C ngahTua ciangin Tedim hong kap leuleu-in Tedim a hawmin la hi. Mangkangte 120 si-in 70 liam. Tedim mi inn 300 Tonzangah tai uh; Inn teng halsak Thangmual pen “Fort white” kici hi. Mizoram sim lam panin “The expediton 1889 lut” Haksatna thuak lo-in Lunglei luak, kulh bawl uh:
1891 Sept. in Tonzangah kikap, kilemna bawl. Upa teng tawh man (Photo) kila uh, Upate’n theilo-in thausa-in lau uh hi. Oct kha sungin Pu Khaw Cin si, A Sanggampa’ tapa Hau Cin Khup in Khua Cin’ za luah, Hau Cin Khup, Thang Khan Pau, Gin Za Thangte Yangon kipai pih, Mang Kang kumpi in Mizoram a uk kipat 25, 9, 1890 ni-in pasal hangsan Khuang Chera leh Ngul Bawka tlawng lui gei-ah mangkang te’n kap lum uh:

1892 Thantlang la ding kuanin kido uh Rs. 5000 gaam.
1893 Jan 27, 1929 Zomi nam teng gam khatah koih kik nading ngaihsun’ Chin-Lushei Conference’ Fort William, Culculta-ah kibawl hi.April kha-in Thantlang la zo, Oct ni 9 ni-in Pumva leh Thuklai kikalah Myo-ok na suam uh, kap lum, mi thum bek suak ta, Mangkang te’n ni suah na lam Zogam bup nuaisiah zo.
1894 Zogamah thau khempeuh kikhawm, lawng 7000 pha. Kaptel la, Oct. kha-in ukpi 49 Rangoonah ki paipih. Khuapi teng sikkhau kizom
1894-95 1.11.1894 ni-in Rev. F.W. Savidge le Rev. F.H. Lorrain-te Mizogam tun hi. (Khristian Missionary masa pen). Mizo lai – A, AW, B, kipan. Jan-Feb. sung B.S. Carey in Cin hills leh Manipur gamgi bawl, Cin hills khen thum kisuah- Tedim, Falam, Halkha
1895 Mikang kumpi in Falamah Political officer koih. Falam leh Halka-ah Sikkhau-to, Thonginn, Zato inn, leh Sumkepna (Treasury) kibawl. Carey leh Tuck in The Chin hills bu gelh. Zogam pan siah (Leiman) Rs.17,572 kingah. Carey leh Ukpite kilemna bawlin gam khensakin, Kam Hau uk khua -167, Sukte uk – khua 20 leh Sihzang uk khua – 16 suah hi. Manipur Khristian missionary masa pen Rev. W. Pettigrew (Ukhul khua-ah).

1895 Mikang kumpi in Falamah Political officer koih. Falam leh Halka-ah Sikkhau-to, Thonginn, Zato inn, leh Sumkepna (Treasury) kibawl. Carey leh Tuck in The Chin hills bu gelh. Zogam pan siah (Leiman) Rs.17,572 kingah. Carey leh Ukpite kilemna bawlin gam khensakin, Kam Hau’ uk khua -167, Sukte uk – khua 20
1896 September) Kawlgam’ gamkhen khat (province) in Mikang kumpite’n Zogam hong ciapteh sakin Kawlgam tawh hong gawm. Mizo Laibu neih kipat kum. 21-8-1895 Lusei pau tawh Thukhunthak Luka laibu kinei. Sim leh Mal-a kikhen Lushai hills pen kigawm hi.
1898 Chin Hills Regulation Act kibawl. Hih Thukhun tawh tu huna Chin State, Mizoram, Manipur singtanggam teng uk. Ukpi hong piang:Tedim gamah Pu Hau Cin KhupLumbanggamah Pu Hrul MungFalam gamah Pu Thang Tin LianHaka gamah Pu Kio MangTaichun khua-ah Pu Con BikMatu/Mindat gamah Vumthumaung Chief Commissoner Sir Frederick Frayer Tedim, Falam, Khalkha hawh. Mizo biakinn masa pen kipan. Kawlgam (Chin hills) leh manipur gamgi kikhung hi.
1899 (2-4-1898) Mizoramah Sangin kipan. Mizo pau-in Thuciamthak – Luka leh John kizo. Mangkang ukna deih lo-in Zomi makaite’n Mangkangte langpanna bawl. Mikangte in Zomi makaite bawlsia.Pu Thuam Thawng (thong sungah si)Pu Kai Tuah khantawn thong hinapi Thuam Thawngte pata a sih ciangin kisuakta sak a Kaptel pan Zampi khua 1909 kumin na sat hi. Pu Taang Pau Dal (thong sungah si)Pu Ngul Bul (Mangkang te’n that)

1900 Chin hills-ah Christian Biakna tung; Missionaary masa pen Rev. A.E. Carsonte nupa, March 15 ni-in Halkha tung. Pu Pau Cin Hau phuat Laipian Biakna leh Zomite’ Lai neih cilna.Zomite Laisin kipatna, Biakna thak neihna. Pa Pau Cin Hau in Maang mu. Mr. B.S. Carey in ukpi teng tawh kilemna bawlin sialngawng ban. Hau Cin Khup Ukpi-in kikoih. Mizoram, Mimbung khua-ah Guite Innpipa Kam Za Mang a phat mahmah lai tak hi-in, Aizawl DC leh Tedim pan Mikang ulian Dickman ten Mimbungah pha uh hi. Lushai hills leh Chin hills gamgi kikipsak hi.

Posted in Articles | Leave a Comment »

ZOMI LEH BIAKNA ( By-Zo Khai )

Posted by khampeek on 09/07/2009

Amasa-in “biakna” cih kammal akhiatna Zomite-in bangci khiat-hiam? Biakna cihciang-in Zomite-in Religion leh Denomination khencian ngeilo uh-a, Laaisiangtho sinte leh saangkah kiciante longal ataangpi-inzong theicianlo-hi. Mikaangte-in Denomination-pen “A denomination is a subgroup within a religion that operates under a common name, tradition and identity” ci uh-a, Religion-pen “A religion is a set of tenets and practices, often centered upon specific supernatural and moral claims about reality, the cosmos and human nature and often codified as prayer, ritual, or religious law” cihbang-in khia uhhi. Zomite-in Biakna agen ciang-in denomination agen hizaw tawntung-a, tuasung-ah RC, Tuiphuum, EBC, AG, SDA akipan pawlneutuam namtuamtuam bulphuh leh genpi-in nei uhhi.

Biakna (Religion) taktakpen genphaak zong-in neikhollo uh-a, tuate-pen Christianity, Buddism, Islam leh Hinduism akipan biakna guilian tuamtuamte ahihi. Zomite’ genkhaak leh atheihpen-uh Christianity tungtaang themno-khat enlehang, Mikaangte-in muanhuaitak-in Pasian’ maaipha azonna’ hang-in Zogam-ah Christianity hongtung-a, huntomno sung-in Religion kiciankhat ahi pupa’ Tualbiakna pan-in Christianity-ah Zomipampi kikheel uhhi. Theihpakding-in Tualbiakna-pen Christianity ahihkeileh Buddism tezah-a guikipnei biakna lianpi ahihna (Tualbiakna-ah ciahkiikni cihna ahihloh hang-in) theihhuai ahihi, banghanghiam cihleh hihthu-in Zomite Ngeina leh Biakna kician anei minam piicing ahihna kipasak ahihman ahihi.

Christianity sungpan-in Denomination tuamtuam: RC, Tuiphuum, cbt, a-om mahbang-in Tualbiakna sung-ahzong Denomination tuamtuam: Gualnamte’ dawithoihzia, Sukte, Guite, Thawmte’ dawithoihziate themcikcik kilamdanna om-a ahizong-in ataangpi kibangkim cihtheih ahihi. Tuabaan-ah akhuakhua, akhawkkhawk-in phuisam aisaanna nengcikcik akilamdang a-om hang-in apaipi Tualbiakna ahihman-in gui-khat ahihi. Tua-tawh akibang-in Chritianity-zong Denomination tuamtuamte nengcikcik kilamdang ciat-a, Lpd, Mikaang gam-a Tuiphuumte’ paizia leh Zogam-a Tuiphuumte’ paizia nengcikcik kilamdanna a-om mahbang-in RC, AG abang khempeuhzong tuabang ahihi. Ahizong-in avekpi-in gui-khat hi-a, Religion khat ahihi.

Hih Religion akici biakna khempeuhte’ dinna ahihkeileh aki-ngakna ahihkeileh apiankhiatna guipi-pen minam leh amun-amual (race and its geograhpy) tuang-ah akiphut vive ahihi. Tua’ tung-ah athupipen aguipi-in “Mite-in apingthei thusiapi-khat akihtaakna’ hang-in khusakzia akipuahphat nading, khatlehkhat gaalbang sabang-a kidona leh kithahna akiam nading, thukhualna leh kiveipihna akhannading cihte’ tung-ah biakna (religion) kiphut-a, tua’ tungpan-in hihlaai-a akizangh kipattahna-pen hialaai-ah neemsak zawdeuh ahihkeileh khauhsak zawdeuh cihbang-in Denomination tuamtuam hongpiang ahihi. Biakna guipite’ taangthu aki-etkiik ciang-in minam-tawh tonkhawm den-a, minam ahihkeileh gam kuamkuam-a kipawlna ding-in biakna kizanghhi. Tua ahihman-in tuni-a akithei leitung-a biakna lianpite-in biakna sungpan-in sahkhua kivaanna (social welfare) tawh naakpi-in thuah uhhi. Lpd, RC te-in sahkhua kivaanna(cimawh huhna, dongtuakte panpihna, meigongtagahte khoihna) cihte-ah athahaat man-in tuni ciangdong biakna phungcing-in khangpha mahmahhi. Leitung biakna paizia hihbang ahih nungsang-in Zomi tampite’ biakna leh minam amuhna sittel-huai mahmahhi. Abiaknavaai (religious) mahmah akici mi-in sahkhua nasepna (social sevices) lam-ah athahaat mahmah keileh social lamsang-ah kisapna anei-mi ahihi, banghanghiam cihleh denomination ahilo biakna paipite’ nasep masuanpipen minam puahna ahihi.

“Inn-gua hahlo, gam-gua hah!” Zomi pupate’ paunaakpen tuabang-a gamgua ahah mite a-awilohna aciing hi-a, taanglaai mipil (Tumlam gamlian mipil) te nangawn-in tuma kum 1600 laaipekpan-in tua paunaak theician khin-uh ahihman-in inn-gua hahding bulphuh-uh ahihman-in, Romans, Germans, Franch, leh English te-in biakna guipi Christianity hiveve mahtaleh amau’ minam’ kipuakzia ciatciat-in seekciat, zuunciat uhhi. Hihpen minam’ hang ahihi. Avekpi-uh’n tuni ciangdong phungcing mahmahlel uh-a, minam itna aliante biakna-haat ci-uhhi. “Minam anaak-it mite biakna-haat” cihthu maanlo-hi ci-a nial nading thulah kician omlo ahihman-in amaan cihtheih ahihi. Nungzuuipi Peter-in Jews mite’ kiangbek-ah hawhnopna aneihpen Pasian-in mawhsaklo-in Konelih kiang-ah ahawh ding-in sawlhi. Jewlo mite’ kiang-ah apai ding-in asawl hibek-a, apainoplohna-pen mawhna cilo-hi. Tua-pan kipan-in biakna guipi-pen minamtawh aki nahvawh toto hi-a, Reformation kipatma leh tuni ciangdong biakna-pen colonialism tawh akalsuan toto ahihi. Vaan Kumpigam Thupha kigen khalo hileh khuakpilna-tawh gamkeek vive ahihi.

Hih thu-tomno akhaakna ding-in, mi khat-in biakna kikhopna’ sang-in ama’ minam kikhopna azuat zawkleh ahithei (saantheih) hi-a, ama’ minam taaisan-in biakna azuatleh saantheihloh ahihkeileh mibanglo ahihi. Israel te-in Judaism leh biakna tuamtuam taaisan thei-a, a-minam hihna taaisan theilo-hi. Dawite, milimte bia ziauziau uh-a, a-minam hihna-tawh Pasian-in thuhilh-in samkiik denhi. Biakna namtuamtuam om-a, ka-minam khatbek omhi. Minam tuamtuam kahikei-a Zomi bekmah kahihi. Ka lutang Zomi, ka-khe Kawl, ka-khut Vaaite, ka-gil Mikaangte cihbang omthei ngeilo-hi. Mihing-in minam khatbek nei-a, tua mihing-in a-uut-uutna-ah biakna pia-thei-hi. Minampen kibawltawm theilo-a, biakna-pen akibawltawm vive ahihi.

Zomite ataangpi Christian hi-a, denomination namtuamtuamtawh abuaite ahihi. Buaitaaklo-hi, banghanghiam cihleh denomination: RC, Tuiphuum, AG cihte leltakpen alutangpi Christian hi-a, tuabang denomination khatpen keibek-inzong “Khuukdin thunget deih, neekkhawm thupisak, tuphuum thupisak, Zeisu lianbelsak, gamtatpha kisinnuam, daaitak-a Pasianbiak lunggulh,” ci-in a-omsa pawlpite’ neihloh thu-nengno-khat neibek lengzong denomination-khat ka-phut thei-hi. Ahizong-in “Zomi uutkhang-in minam thak-khat kipanning” cihbang omtheilo-hi. Khatbel omhi “Guai-aw, Pu Gualnam’ suanteng minam khat-in kisehni, behtuamtuam lo-in minam kici theilo ahihman-in Zokhai-beh, Nang Khai-beh ci-ni” cileng hithei khadinghi. Tua nangawn Zogam, Kawlgam, Vaaigam leh muntuamtuam-a Guamnam behteng-in hong thukimpih loh-in apiang theiding-a saantheihloh ahihi.

Minam sung-ah beh tuamtuam a-om mahbang-in biakna (religion) sung-ah pawltuam (denomination) tuamtuam omhi. Tua pawltuamte uut-uutna peuh-ah kiluut thei-a, ahihang-in beh adang khatpeuh-ah ka luut theingei keidinghi. Luutzong luutding ahitheilo, akilawmlo, Piangsakpa hawmthawhna ahihi.
Kei’ muhna hongsuut hilo-in, thumaan thu-omsa-thu te gentehna kiciantawh lak-in hongsung kahihi.Telcianloh a-omleh thudamtawh kihoding hongkimuak gige-hi.

By- Zo Khai

Posted in Articles | Leave a Comment »

TAGAH KEPNA (By-Dr. Ngul Khan Pau)

Posted by khampeek on 06/07/2009

TAGAHTE KEPNA (J.M. Ngul Khan Pau)

May 15, 2009 ni-in Manipur panin Chennai a tagah kepna khat om ding
naupang mi 10 val ko omna compound panin Guwahati meileng tual lamah ka
va kha hi. Zo ngeina-ah tagah gentheite’ kuamah kinusia loin khuasung
hausa upa vaihawmte’n amau nuntak nading na geelsak uh hi. Tua bangin
khuasungah a cimawh a om hangin innveng innpaam huhna leh beh leh
phungte’ kepna tawh na khosuak uh hi. Tuhun ciangin tagah kepna tawh
kisai a hoih ding deihna tawh India gam mun tuamtuamah Zomi genthei leh
tagahte kikoih koikoi hi. Ka lungsimah awlmawhna ka neih zawh a sawt
hangin ka gelh man kei hi. Tuni in hih tawh kisai tam lo I ngaihsut khop
dingin kong khak khia hi.

(1)Min leh puam: Tagah kepna kibang khin kho loin mun pawl khatah
amau pianpih Zo min kizang thei nawn loin Mikang min ahih kei leh
Lai Siangtho min khat peuh kipia hi. Namdangte’n I min sap ding
haksa sa uh hi cih pen ka thei hi. Kei zong ka min *NGUL *cih
haksa sa lua uh ahih manin Mikang, Mivomte’n, “Kong bang ci sap
ding hiam?” hong ci gige uh hi. Minam liante’n amau min sap baih
sap hak cih phamawh sa sese lo uh hi. Bang hang hiam cih leh amau
*hihna* (identity) zumpih lo, tham loin kisak theihpih uh hi. I
tate’ Zo min pu nawn lote’n hong picin uh ciangin bang ci
ngaihsutna a nei ding uh hiam? Zomi a kicih hangun Zo pau zang
thei nawn lo leh a u leh naute tawh zong Mikang pau khawng bekin
hong kiho ding uh hi. Mikang pau I deih mahmah tei hangin I laigui
kizoppih tawh kiho nadingin I zat ciangin nuam I sa ding hiam? I
min ut peuhpeuh kiphuakte kihi loin, pi leh pute kitap ngekngekte
I hi uh hi. Tua tagah kepna sung hong paisante’n a mintapte
nangawn zang thei nawn lo ding I cih ciangin ama minam hihna bek
hi loin a mintapte tangthu zong a bei suak ding hi.

Tagah kepna tawh kisai I gen laiin; tunai mah in India gam thuuk lamah
tagah kepnaah nasem ngei numei khat in, ama tuah khak thu hi bangin gen
hi. “Tagah kepna
neite’n khatveivei numei naupang I kepte zan khat zan nih dingin tawn
khiatpih thei zel uh hi. Tua pen mun khenkhatah numei bek hi loin pasal
naupang zong luppih dingin
sam thei uh hi,” ci hi. I tate tua banga kap leh mau dingin I phal hiam?
Tagah kepnaah koih ding I hih leh zong tua mun tawh kisaiin thu leh
kician takin theihna kinei masa
leh hoih lo ding hiam?

(2) Pau leh ham: Minam khat kitheihna pen pau leh hamah a hi hi.
Ganhingte zong I theih loh hangin kiho theina khat nei cih I thei hi. Tua bangin ei zong khat leh khat I ki-itna kizopna a hat na dingin pau leh ham kizang hi. Tutungin Manila ka hawhna-ah Nepali lawmte khat Aizawl, Mizogamah piang tu’n a zi Taiwanese tawh Taiwanah Pasian nasem ka kimu uh hi. Aman Lusei pau a zat loh
zawh sawt khin zo napi-in a neu lai pau ahih manin holimna ka neih
ciangun a pau masa ding ka kituh uh hi. Email hong khakna-ah,
“Nang tawh I kikholh theih leh “Mizo tawng” a I kiho theih nuam
kasa mahmah hi,” hong ci hi. Mikang pau a kiho thei ka hih hangun
Lusei pau a kiho pen kitelzaw mawk hi. Guwahati-ah “eimi” khat a
neu lai panin tagah kepnaah na khangkhia, tu’n nasepna hoih mahmah
hong sem om hi. Ei lamte’ pau khat zong theih nei vet lo, Mikang
pau leh Tamil pau thei bilbel hi. Tua ahih manin Guwahati hong tun
hangin kikhopna, lawm leh gual tawh kikholhna haksa sa mahmah hi.
A mel leh puam I et ciangin Zokam tawh hopih theih ding a bat
hangin thei kiuhkeuh lo hi. Beh leh phung ahi phial zongin I pau
hong kibat loh ciangin kizopna baih lo hi. Delhi, Mumbai, Chennai,
Bangalore khawnga hong khangkhia I tate’ Zopau mah tawh I hopih
hamtang ding thupi hi. Mikang pau pen I sangkil kaan khia peuh
le-uh zat kul ding hi.

(3) Midangte tawh kikholhzia: Ganhing leh mihing kibat lohna ahih
leh ganhing in ama kibatpih bek tawh kikhawl a, mihing in ei
kibatpih loh tawh I kikhawl thei hi. Cih nopna-ah sakhi in sakhi
kikholhpih a, zawng in zawng bek mah kikholhpih hi. Mihing I hih
leh Kawlmi, Kalate, Mivomte, Mikangte tawh I kikholh theih ciangin
ganhingte sangin a sangzaw I hi ding hi. Midang tawh kikholhzia I
gen ding ciangin paizia nam nih om hi. Khatna-ah, Zo pau leh
identity simmawh bawlin midangte pau leh ngeina bek hoih sa I hih
leh ei leh ei kizuak I hi hi. Zo kam leh Ngeina midangte a sangin
neuzaw tuan lo hi. Midangte’ a bek thupi I sak leh minam neu, zop
ding belh ding a zong koikoi lungsim na nei hi. A nihna-ah, ei a
thupi sa lua leuleu in midangte pau leh ham simmawh kha I hih leh
zong midang tawh kikholh kisiam ngei lo ding hi. Mi tawh kikholh
siam mite mi hampha hi. Tua pen “siamna” (art) khat na hi gige hi.
Mi tawh kikholh siam nadingin a kisam theih ding pawl khat hih
bang hi.

A min theih sawm masa in: “Hong thei kei vengin na min bang ahia?”
ci in. Tua ciangin “Na phone numbat, leh address, email cih bang
nong pia thei diam?” ci-in ngen in. Aman a business card hong piak
leh nang zong nanga piapah in.

Ama lunglutna lam kikuppih in: Nang lunglutna bek genpih ken

A thugen za bek hi loin a maitang mah en in ngaikhia in

*

Nang lam na kigen ciangin kisang gen ahih ke’h kiniam gen lua ken.
Nang leh nang na kimuhzia tawh lawm leh gual kikholhzia kisai
mahmah hi.

*

Hun a neih leh neih loh tawh kizuiin hun zatzia siam in. Amah
manlah mahmah ahih hangin nang lah gen ding hau lai mahmah cih
bangin om ken. Tua na gen khit sangin hun danga dingin siit leteh
lungdamzaw ding hi.

(4) Tagah kepzia thak: German Pawlpi makai khat tawh Pataya,
Thailand-ah ka kiho na uh ka phawk kik velval hi. Ama genna-ah,
“Tulai-in tagah kepna inn tuam lamh lunglut nawn lo hi. Ahangin,
tagahte’ kisap masak penpen “innkuanpih” hi. Tua ahih manin amau
ading inn a tuam a I lamh sangin Khristian innkuanah khat khat in
kikoih leh hoihzaw hi. Nu leh pa, u leh nau hong neipah ding a,
innsung nuntakzia tua panin hong sin ding hi. Tagah innah I koih
ciangin innkuanpih ding, nu leh pa nei lo uh ahih manin tagah
sawnsawn lai uh hi,” ci hi. Tua pen Khristiante gamtat dingzia hi
leh kilawm mahmah kasa hi.

Dr.J.M. Ngul Khan Pau

Posted in Articles | Leave a Comment »