Tongsan Weekly Journal

“…ki-itna, lung kituakna, ngaihsutna kibang…” (Phil. 2:2)

Posts Tagged ‘Exodus’

ZOMITE LEH PAIKHIATNA (Zomis and Exodus)

Posted by khampeek on 14/05/2009

ZOMITE LEH PAIKHIATNA (Zomis and Exodus)

Zomite Dinmun: Leitungah mipil,misiam, mihau leh mi minthang khat peuhpeuh a ma hihna amin, khua leh tui leh a minam leh agam kidong nuam sese hi. Ei Kawlgam leh Zogam adingin kua khua, kuabeh, kua minamte cih kidong hi. Hih lai ah minam thupitna khat kimu thei hi. Minam kician khat leh minam khantoh theihna dingin mimal (population) zong i tam photphot ding thupi hi. Khangluite in ” I tam in hong gualzo sak a, i tam in hong nungta sak na ci uh hi. I theih pak dingin Malaysai, Singapore gamte ah Zomiten nai septheihna pen a mau mimal tawmin, nasem ding mi kicinloh man ahi hi. Leitung ah minam neute leh a tawmte kisimmawh nuamin thuneihna nei zolo ahih manin guallel den uh hi. Kawlgam tangthu ah abeisa kum zalom (Century 8-9) pawlin ngeina le Lai limtak a nei ngei, a mau leh amau ki-uk a, Kumpi guikizom(Dynasty)nangawn a nei ngei Pyu minamte pen tuhun ah upmawh huai lo zah dongin mangthang uh hi.

Zogam ateeng Zomibup mimal(population) pen Lakh 5 kim bek kipha a, Asho Chin te leh Kawlgam mun tuamtuam ateeng te tawh kigawm in Awn khat(1milloin) kim hi ding kideih bawl hi. Kawlgam bup mimal (population) pen 55million tawh etkak leng kitawm lai mahmah hi. Minam khatin Ngeina leh Lai kician kinei hi-in, i ngeina le i laite i kep kei leh Pyu minamte mah bangin a kimangthang thei lua ahi hi. I tawm manin minam kician lo kici thei lo a, i ngeina le i laite i kepzawh ding a thupi pen ahi hi. Ngeina pen minam kepcingna lian pen ahi hi. Minam tawm mahmah lai i hih manin, a mangthang thei lua i hi. Koi koi i tung a i kikhen thang phial zongin, i ngeina leh i Laite i kepcing ding mah thupi penpen ahi hi.

Zomite Pusuah zia: Mundang gam dang i puasuah zia nam 4 in kikhen thei hi. (a), Sum le paii nei zawdeuhte gam minthangte ah zinkawikawi ding leh a teengsa sanggamte kiangah hawh (Tourist)dan tawh pusuahna, (b)Leitung pilna,biakna lam pilna leh thusinna tuamtuam tawh sangkah ding pusuahna,(c)Kumpi leh Company pan thuneihna tawh sum zong ding a pusuahna,(d) Nuntak haksatna hang tawh a lal(Migration)ding pusuahna cih bangin kipusuak khengkhang hi. A hi zongin Zomite sungah sum nei a, leitung kimkot ah khualzin kawikawi(Tourist) pen kitawm lai mahmah ding hi. Pilna siamna sin a pusuak ahih leh tawmtawm ki om a, nasem / sum thalawh a pusuak kitam pen kha ding hi. Tu lamlam ciangin a teeng alal zong kitam pian ta hi.

Hih Lalna(migration) pen leitung ngeina hi a, peemta dan hi loin nuntak nop zawkna ding ngimna ahi hi. Tanglai pek akipan in English mite pen America leitang,Australia, Canada leh Newzealand gamte ah na lal uh hi. Jews(Israel) te zong America leh Europe gam tengah na lal uh a, Israel gam a phuat khiat uh 1948 kum ciangin tampi tak ciah kik uh hi. Sente in, ” Leitang a om nak leh Sente om ding hi” cih paunak a neih mah bangin Sen(Chinese)te pen leitung mun tuamtuam ah na lal kawikawi uh hi. Tua banah mivom(kalate) zong mun khempeuh ah na lal uh a, leitung kizel phial mawk uh hi. Hih Lalna pen leitung ngeina ahih ta zongin, mimal tamte ading phamawh kei ven, ei mimal tawmte ading i minam Ngeina leh i Laite kem kei leng a manthang thei laite i hi hi. I mimal tamna in hong nungtasak ding ahih manin, Zomite i pusuah zelna pen Zogam a om laite ading in supna lianpi tawh kibang hi. A hi zongin kua mah Lal kei un kicih ding ciangin, nuntakna haksa lua ahih manin akihuh zo kua mah ki om lo zel hi. Tua hi-in a Lal(migration) khinte in i ngeina leh i lai khauhsuah loh ding thupi hi. Tua bek hi loin, i khua i tui, i minam ading na hoih khat teitei i sep sawm ding kisam mahmah hi. Israel te pen atuntunna pan a gam uh zuun tangtang uh hi. Koi mun i tung a, bangbang i sem zongin, pianna Nu leh pate leh khua le tui i mnagngilh het loh ding thupi penpen hi. Koikoi i tung zongin, i tate minam itna leh i ngeina laite mangngilhsak lo ding thupi mahmah hi. Tua hi peuh leh koikoi i tung zongin Zomite kimangthang ngei lo ding hi.

Thukhupna: Tua ahih manin, gam dang pai dingte in na pai ma in minam itna lamah Piangthak masak ding kisam penpen hi. gamdang tun khit aminam itna lamah pianthak pen ttheih tamin teltawm mahmah hi. Sen(Chinese) te,Israel cihte in a tuntunna panin a gam alei uh zuunin puah uh hi. I tuntunna gam pan i minam a ding akisam pilna, siamnate gu in i Zogam i puah kik ding thupi mahmah ding ahihi. A kikhem tham het lo a cii tawm lai mahmah Zomite kithukhat in, i omomna ciat pan i pianna khua leh tui leh i minam zuun khawm ding hi hang. LST sungah Kamsang Nehemiah in a thungetna ah, ” …Hong pai un zahkona i thuak nawn lohna dingin,Jerusalem kulh ciang pha ni…”( Neh.2:17-18) a cih bang mahin, ngimna hoih tawh i gam i lei i puah hun khat hong om veev na dingin Pasian khephung ah kiniam khiat in thungen ni. Laisim mimal kim Topa i Pasian in hong makaih ciat ta hen.

Minam leh Pasian ading naseppih,

Sia Khampeek(Tongsan Pu)
Norway

Advertisements

Posted in Articles | Tagged: | Leave a Comment »