Tongsan Weekly Journal

“…ki-itna, lung kituakna, ngaihsutna kibang…” (Phil. 2:2)

Posts Tagged ‘Minam’

A PICING MINAM

Posted by khampeek on 02/05/2009

A PICING MINAM

Zomite Khristian i suah zawh kum 100 leh apam pek i cing ta a, mai November 4-7,2010 ciangin Cope topa in Zomi(Tedim) mite sungah Pasian thu hong pattahna leh i Zolai hong bawlsak zawh Kum 100 cinna (Cope Centenary Cerebration) thupitak i kham sawm leuleu ta hi. Tua lai ah ” Pasian zat Minam” cih thubulphuh in neih ding i makaite in hong telkhia uh ahih manin teelsiam kasa mahmah hi. Pasian zat minam le mimal i hihna dingin Ci le sa thu le kha lam thu ah picinna kisam hi. Pasian in hong sap khin ciangin tawmvei sung khat mah a ma zattheih dingin hong nungta sak phot a, tua sung pan apicingte mah Pasian in zang pan hi. Cope topa pen Zomite a ding Gammial nasempa(Missionary),Laihilh pa(Educator) leh Laitei pa(Translator) ban ah Zolai simbu bawlpa(Zolai text book founder) zong ahi hi.Cope topa pen mipil ahih banah mipi cing khat ahih manin Pasian in zang takpi mawk hi. Hih Zolai kum 100 cinna ah Cope topa tangthu leh Zomite khantoh zia cih laibu zong kibawl sawm a, tua laibu sim kal ding i ngaklah mahmah hi.

Hih Cope topa in Zolai hong bawlsak manin Zomite Pasian thu le pilna lamah i picinna etkik huai kasa hi. Khristian kum 100 i cinpih Meitei,Mizo leh Naga etc.. te pen 100% laitheihna(Literacy) om zo uh hi. Mizoram bup ah laithei (Literacy) mi 100% in laisim,gelh thei ta uh hi. Pasian thu hangin a kileekkim khantohna nei uh hi. Kamdang khat in gen leng Laithei minam leh gam pen khangto ham tang cihna ahi hi. Tua hi-in Zomite lai lamah i khantoh/ i manawt zawkna ding ngimna tawh Zomi Christian Literature Society(ZCLS) leh Zomi Literature Uplift Society (ZOLUS)te i nei ta hi. A hi zongin hih kipawlna minte tawh leitungbup Zomite zattheih dingin website kician takpi zong i nei zo nai kei hi. Zomite sungah Kaalsim thukizakna ahi,TONGSAN Weekly,Momno, Zotimes, Khasim thukizakna Tedim Thukizakna, Zangkong Awging(FGA) cih bang bek i nei hi. A sawt loin Zolai i neih zawh kum 100 hong cingta ding a, kum 100 sungah Magazine, News paper leh Novel etc.. laibu kician bangzah i nei ta hiam cih ngaihsut huai ding hi. Laibu hoih a i gen theih dingin Pu Sing Khaw Khai gelh ” Zo People and Their Culture”, Dr. Vum Son gelh ” Zo History “, Pasian thu lamah Rev. Pu Khup Za Go leh Rev. Pu Job Thawngno gelhte cih bang bek i sim theih om hi. Laibu kigelh khia tam limlim leh asim ding mi hong om om ding ahi hi. Laigelh ding mi kisam lai hi hang.

Tua hi-in Zomite Khristian i suah hun tawh kituak in picin hun mahmah ta hi. Pasian thu theihna(Kha) thu leh Laitheihna(Literacy) a kilekkim ding kisam lua hi. Lai neih thupi mahmah a, Laitheih thupi zaw kan lai hi. Tuhun thak sungah Lai thei/ mipilte bek mahin nasep hoih ngah in picing nuntakna nei thei bek uh hi. Na khempeuh pilna tawh kisem in pilna tawh thu kigen ta hi. Minam khat a picinna pen Lai theihna tungah kinga hi. Mipil namte mah picing zaw hamtang uh a, khangto pah uh hi. Zomite kha thu leh Ci le saa thu ah hih dinmun ciang i tuntheihna pen Cope topa in Lai nasep a thupisak man ahi hi. Pasian zat minam i suah theihna dingin Pilna tawh a kidim A PICING MINAM i hih masak ding kisam hi.

Minam a ding deihsakna tawh,

Sia Khampeek
Tongsan Pu

Advertisements

Posted in Articles | Tagged: , , , | Leave a Comment »

PASIAN ZAT MINAM

Posted by khampeek on 27/04/2009

PASIAN ZAT MINAM

Zomite Khristian i suah zawh kum 100 val ta a, Cope topa in Tedim mite lai hong bawlsak zawh Kum 100 cinna mai 2010 ciangin a bawl sawm hi hang cih nungin kong gelh khin hi. Cope topa pen Sangmang i cih theihna ding Kha lam thu(Christ Gospel) leh Ci le sa lungdamna or khantohna(Social Gospel) a kici Lai nasep hong patsak ahih man ahi hi. Zonet sungah tulaitak bangin minam veii zaw ding i kidem ngeingai a, i min nung ah ZO laimal nangawn i koih nuam ciat hi. Minam veii leh a it masa taktak pen Cope topa mah hi pah hi. Minam kician khat hihna dingin pau athupit zahkhat in Lai a thupi zaw lailai ahi hi. Lai pen pilna ding bek hi loin minam kepcingna ding a thupi pen ahi hi. Kamdang khat in genleng Lai thei/ mipilte mah Pasian in zang hamtang nuamin lai thei mipilte mah picing zaw hamtang uh hi. hi. Pasian in mi a zatnop ciangin a muan huai leh a picin masak ding deihna tawh tat thapai masa den hi.

Tuhun i minam sungah minam it te khawng a Khami vai lo bangin a mu ki om mawkmawk hi. Minam na it limlim leh minam a bawl Pasian a it taktak na hipah hi. Moses pen Pasian a zatna dingin, a masa penpen apilna siamnate sangin, a veiina leh itna mah thupisa zaw lai hi. Tua bang i cih teh Moses pen pilna nei lo hi lo a, Faro inn sungah Egypt pilna hun sawt sim mah a sin khin ahi hi. Cihnopna ah minam itna nei in, ei a mite zong i ki-it ciang bekin Pasian zat minam kisuak thei pan cihna hi. kamdang khat in gen leng kipumkhatna leh kipawlkhop siamna i neih ciangin Pasian Zat MInam kici thei cihna hi.Tuhun i minam nasepna ah Pasian nasemte in pawlpi ciat ah mi kihau pen ahih manin,i Pulpit tung pan itna thu i gengen pen minam itna mah a gengen i hih lam phawk den ding kisam hi. Zomi ka hi hi i cih taktak leh Z-Zeisu leh Z-Zomi pen kikhen thei lo ding cihna zong ahi hi. Gam khangto te ah Pasian nasemte mahin mipite nam itna lungsim guan thei uh a, a sepkhiatna lam ah bel Biakna leh Nam vai a tuamin sem lel uh hi.

Tua hi-in Zomite thupha ngah minam ci in kambem dimin i gen ciat mah hi.Thupha ngah minam leh Pasian zat minam i suah theihna dingin, Pilna, siamna banah a thupi pen khat minam veii/itna nei photphot a, i kipumkhat ding a kisam pen ahi hi. Tua bang a kipumkhatna a khanna dingin kithumanna leh makaihsiamna zong kisam hi. Zomite pen a kilangpan, a kikhen tham ding minam i hih het kei hi. Zomite pen a kipawl thei lote i hi kei a, a kipawlkhop a siam nai lo bek i hi hi. Minam a ding na lianpi i sep sawmna ah kipumkhatna kisam a, kipumkhatna mun ah lawhcinna om thei bek ahi hi. Tua bang a i kalsuan ciangin i minam in Thupha ngah minam leh Pasian zat minam i suak thei pan ding hi. Z- Zeisu leh Z-Zomi a gawm khawm tawntung minam i hih ciangin, PASIAN ZAT MINAM i suak ding hi. Laisim mimal Topan hong makaih suak lai hen…

Minam itna kiu khat pan,

Sia Khampeek

Tongsan Pu

Posted in Articles | Tagged: , , | Leave a Comment »