Tongsan Weekly Journal

“…ki-itna, lung kituakna, ngaihsutna kibang…” (Phil. 2:2)

Posts Tagged ‘ZomiSiamsin’

HUN THAK IN HONG KALH THUTE

Posted by khampeek on 11/05/2009

HUN THAK IN HONG KALH THUTE

Thu patna: I gam leh i nam makai ding ahi Zomi Siamsinte tawh kithuah mahmah nuam kasa a, ka angtang ngitnget hi. Siamsin cih ciangin kamdang khat in gen leng Pilna, siamnate’ phualpi kici thei hi. Tuni a Siamsin tuailaite pen Zingciang a i gam leh i nam, khazih leh pawlpi makai dingte ahi uh hi. Zomi Siamsin Pawlpi akipat khiat zawh kum tam sim mahmah ta a, mun tuamtuam ciat pan ahun zui-in Siamsin Magazine min tuamtuam tawh hong bawl zel uh hi. Zomi Siamsin (Kalay University)te in Magazine Vol.2 ciang hong bawl khin uh a, tua sungah ” Minam Khantohna ding Thusimte ” cih thului (Article) ka gelh khin hi. Tu in Magazine Vol.3 na ading ” Hunthak in hong Kalh thute” cih thulu tawh thului (Article) gelh kik thei ka hih manin, Siamsin Magazine Comittee tungah ka nuam mahmah hi.

Pasian in na khempeuh hun nei-in bawl dimdiam a, ahun zui-in kikhelsak diamdiam hi. Khuahun kikhelna zui-in hunlui leh hunthak omin, na khempeuh zong alui leh athak om thei ahi hi. A beisa hun khat lai a na(van)thak khat pen a sawtsawt ciangin alui suak hi. Rev.ST. Hau Go in agen ngei khat leh LST sung zongah a om hih anuai a kikhelna tawh kisai kammalte za ngei ciat ding hi hang.
– A lui lakah athak om a, athak lakah asia om hi ,
– A lui khempeuh sia khin lo a, athak khempeuh hoih kim lo hi,
– A lui sung pan athak la in, athak sung pan alui nolh leng.etc…,

Hun thak khat akikhel simin a hun zui a nuntak khuasak theih ding thupi hi. A hi zongin Zomi hihna Zolai,Zopau, Zo Ngeinate leh Zomi nam puante..etc kikhel thei tuan lo a, khel ding leh ngaihsut ding tampi mah om zel hi. Tua hi-in tuhun thakin nang leh kei tung pan hong kalh thute ensuk ding hi hang.

1. Kikhelna: Lai Siangtho sungah Thuciam lui/ Thuciam thak(The Old Testament)om bangin, Thuciam thak/Hehpihna hun(The New Testament) om sak hi. LST lui sung a Pasian thuciamte pawl khat LST thak hunah a tangtung khin a om mah bangin, mai lam hunah a tangtung pan ding pawl khat mah om hi. Tua mah bangin Khanglui lai hun (Old Genaration) a om bangin Khangthak/ Hun thak(New Generation) om zelin, tua hunthak sungah nang leh kei a lut i hi ta hi. Leitung khantohna manlang lua ahih manin, na khat peuhpeuh a ni, a kha zui-in a thakthak kibawl khia ta hi. Tua a kibawl khia mengmeng vante sia/lui nai lopi-in hun tawh kituak nawnlo (Old Model) suak lel a, khuahunlap /vanthak(New model) piang den ahih manin athak bekbek mah kidelh delh hi. Hun thak sungah i lut ciangin ahun zui nuntak siam kul hi. Tuhun tawh kituak nawn lo a nusiat huai thu pawl khat a om mah bangin a kinusia thei lo thu pawl khat mah om zel ahih manin a kilekkim nuntakna kisam mahmah hi. Innkuan, pawlpi le kipawlna tuamtuamte ah i kalsuante zong a khuahun zui a kikhel theih ding thupi lua hi. I phawk tawntung ding khatah na khempeuh a kikhel den hangin a kikhel ngei lo khat om a, tua pen Jesuh Khrist leh a kammal LST ahi hi.(Heb.13:8).

Mihingte pen kikhelna/ hun thak a kisam tawntung ahi hi. Kikhelna om loin khantohna om thei lo cihna hipah hi. Hih kikhelna ah mihing pumpi/hihna kikhel cihna hi loin lungsim, nuntak khuasak ziate ahi hi. Kamdang khatin gen leng a kilekkim nuntakna kici thei hi. Gam khangtote ah hunthak khat a kikhel simin nuntakziate kikhel pah lianlian hi. Kha lam thu zongah i pianthak ciangin nuntakna kikhel/kilaih in gamtat zia athak khat kinei pah lian hi.(IICor.5:17). Tua mah bangin dinmun niam(Tualniam)na pan dinmun sang(Seisang) i tun ciangin ngaihsutna leh nuntakziate kilamdang pah hi.

Hih kikhelna/ hunthak cih kammal pen a thupi mahmah khat ahi hi. America President 44 na ahi Mr. Barack Obama in US president a ngahna ding in “Kikhelna/Hun thak- Change,Change” cih kammal tawh US mipite lungsim lakkhia zo mawk hi. Hih pen a beisa August 28,1963 kum tuma kum 45 lai -in America gam ah mivom le mikang kideidanna khauhpai mahmah a, Mivom nam Pastor Rev.Dr. Martin Luther King Jr. in US mipi 200000 mai ah “I have a dream- Mang khat man ing” cih a thugenna tungtawn in kikhelna lianpi(The Great Changed) piangsak hi. Tua kikhelna hunthak pen tuhun a mivom nam tagah khat Mr.Obama kumpi a ngahna ding a gen kholkhol hi gige hi. Hun lui lai a ki-it zolote hun thak ah ki-it kikhual semkhawm bawl khawm cihna hi mawk hi. Tua hi-in hunthak in hong kalh thupi pen ahun zui a kikhelna ahi hi.

2. Pilna leh Siamna: Tuhun pen pilna hunpi (Age of Knowledge) kici in nuntak khuasak a nop zawkna ding ngaihsutna tawh pilna, siamna,hauhna le minthanna cihte a ciangciang pan kizong ngeingai ciat hi. Tua bang in a kizonna ah a manlang mahmah thukizaktuahna le kizopna(Media and Information Technology) vive kizang ahih manin, hun tomno sungin leitungbup thukiza thei ziau hi. Tua manin leitungpi pen mipilte in Leitung khuaneuno(Global Village) ci zawzen uh hi. Nasep silbawlna khempeuh thatang kizang nawn loin Set khuak nei(Computer and Internet Service) vive tawh tutmun pan olnotak na kisem ta hi.

Hih pilna thu i gen ciangin a zaipi khat hi-in a tom thei pen in Pianpih pilna /ciimna leh Sintawm pilna ci-in kitomgen thei pen ding hi. Pianpih pilna cih pen tuhun thak sungah kitamzat thei nawn mel loin sintawm pilna pan a siam, a thei taktakte hun ahi hi. Hih hunthak sungah mikang lai/pau kisam mahmah a, mikang pau/ lai a thei a siam taktakte mah lawhcing baih uh a, a thei lote mabing mahmah uh hi. A niam pen nasep lokhawh sing puakna ah zong pilna kisam ta ahih manin lokhawh zia a siamte in ankhing kham uh hi. A beisa hun khat lai-in hauhna kisam masa a, tu hunthak sungah pilna kisam masa leuleu hi hi. Hun khat lai-in , ” Ka zawnin hong hai sak” cih paunak kizang a,tu hunthak sungah , “ ka hai-in hong zawng sak” cih hong hi ta ding ahi hi. Hun khat lai in pilna siamna nei lo sum nei lel khat kizahtak mawkmawk leh a pil in kikoih a, tuhun thak ah pilna nei tatakte bek mah kizahtak in thupi kisa ding ahi hi.

Tua hi-in gam khangtote ah pilna nei mi khatin a ma pilna tawh kituak nasep a hanciam leh hauh ding baih lam mahmah hi. Mi khat in a ma pilna tawh kituak a nasep khat pen kisimmawh sak thei lo hi. Nasepna pen zum huaisa loin naseplohna zum huaisa mahmah uh hi. Pilna tawh khantoh ding cih pen mimal hanciamna leh akumpi mahmah in hanciam pi in nei pah uh hi. Tuhun pen Pilna tawh hauhna zon hun leh kepcing hun ahi hi. I Zomite sungah nidang a kipan ahau masasa pilna nei lo pian vive i hih manin, i hauhnate khangluite in tuita khang bang a cih bang lianin, sawt kikhop lo in khang kibansam pahpah hi hang. Pilna tawh ahaute pen khang kibansam cih om lo hi. Nidang lai hun in, ” Na hauh nop leh hau masa in” cih paunak khat kizang ngei a, tuhun thak sungah ,” Na hauh nop leh pil masa in” cih hun hi ta hi. Tuhun thakah kipawlna tuamtuam leh biakna pawlpi sungah pilna nei lo sum nei mawkmawkte makaih hun hi nawn loin, pilna nei Pastorte leh makaite mahin makaih ta ding uh hi. Tua bang pilna neite makaihna-ah Kha Siangtho kimakaihsakna kisam mahmah zel hi.

America President 44 na Mr.Obama in , “pilna tawh hanciamna le kuhkal tak nasem mi khat ading a hi zolo cih bang om lo in, US presient nangawn kisem thei lua hi” ci hi. Hun thak sungah akisam masa penpen pilna ahih manin neihsa bei lawh liangin zon huai hi. Tuhun thak pen tapkual thu theihna leh kipilsak mawkmawkna cihte kizang thei pha nawn lo hi. ” Na theih tam na tel tawm ” cih khat a om mah bangin na khempeuh tel mun mel om lo pi a, a thei khin dan a om cihte kingah nawn loin, a thei taktak leh atel sinsente hun ahi hi. Tua manin hunthak sungah hun kikhelna a thei lo sum zong, sum bawlte pen meet ngei lo in sumh den ding uh hi. Lokho khaici vawhpa in zong khuahun kikhel zia thei loin guah zuk hun ding a theih kei leh ankung po tuak loin, anlak hun ciangin anla loin zawng ding hi. Na khempeuh manlang tak kikhel ahih manin, pilna bek mah tawh i delh kei leh kipha zolo ding ahi hi. Hun thak in nang le kei tung pan pilna leh siamna hong kal ahi hi.

3. Thudik Thuman: Zomite pen i pu i pa hun a kipan thudik thuman a deih den leh a citak namte hi hang. Inn le lo vai nasep silbawlnate leh khualzin gamvaknate ah akitaisan ngei lo minam i hi hi.Tua man mahin Zomite kiciamtehna pen thumanna le cihtakna limin Zo Vaphual (Hornbill) kizang hi. Tu khangthak lam a kipan in zuautat/ zuau gen theihna leh cihtak zawhlohna khat Zomite sungah hong lut kha tawh kibang ka ci hi.

Zuau in Ha nei in Khe nei lo a, thudik thuman in Khe nei in Ha nei lo leuleu hi. Khangluite in,”Zuau in mual kua khumin, thuman thudik in kongbiang kan lo” ci uh hi. Tua manin zuau thu pen leng kawikawi in a tukna ding aneih loh teh agen pa/nu kiangah ciah kik veve hi. Zuau gen pen sehnel tungah i din tawh kibang a, huihpi tuihualte a khan ciangin buaina leh lungnoplohna lianpi hong guan hi. Leitung ah a lungnuam lote leh a lunggim dente pen zuau gente ahi hi. A patau dente pen nahoih lo asem dente ahi hi. Thuman thudik genna leh gamtatna pen a haksat zah khopin manpha mahmah hi. Manpha i cihte pen sum leh paii tawh lei theih loh ih mihing hihna (Principle)te a hi hi.

LST sungah Pasian in, “Na tua cih leh… Kong tua cih ding-(Cause and effect)om sak den hi. Tua pen mihingte a ding thudik leh thuman tawh nuntak ding Pasian deihna leh kamciamna zong ahi hi. Tuhun lam ciangin a thuman luate mihai kici in khua hun tawh kituak nawn lo danin kimu mawk thei lai hi. I minam sungah hun khat lai akipan Zuau kang/ zuau namtui cih khat hong laang mahmah ahih manin zuaugen ding le kikhem ziau ding cih haksa kisa lo hi. Kawlte ngian cih khat pen kilimzat ahih manin Zo- Kawl ngian i neih khak ding lauhuai mahmah hi. Khatvei vei Zomite sungah i zawn luat manin a thuman zo lo leh zuau gen tawh i kibat hun bel om thei mawkmawk hi. Tua te pen hong kimakaih zia le i teenna mun leh gamin hong zawh luatna hang zong hi kha thei ding in um ing. Tua hi-in tuhun thak sungah thuman thudik bek kideih in thuman lopi a kimakaihna cihte kideih nawn lo hi. Sum nei khat peuh maitang zahtakna tawh thunei pen leh makaipi cih bangin thuman lopi a kimakaih leh kimai et hun hi nawn lo hi. Thuman thudik bek mah thunei pen leh a lian pen hun hi ta hi. A beisa hun khat lai a kipan Zomite sum zon pai zonna le pilsinnate ah thuman cihtak loh manin i lawhsapna tampi om khin ta hi. Zomite i cihtakna kikhahsuah ahih manin, i cihtakna i ngah/ i neih kik ma tengin Pasian thupha in hong taisan lai ha ding lauhuai hi. Nidang hun a i theih ngei loh leh i zat ngei loh Sang naupangte lai ettehna cihte pen Pasian mai ah zuaupi taw gamtatna nam khat ahi hi. Tua bang guktakna tawh gualzawhna a ngahte a maban uh upmawh zahin a mavang lua tuan lo uh hi. Khangluite in, ” Zuau in a khap tawn” a cih bangin i zuau thaman mah kingah kik veve in kilawhcing zuahzuah thei lo hi.

Tua hi-in hunthak sungah mi khempeuh kihai nawn loin khem(zuau) le thudik a khentel thei kitam mahmah ta hi. Thuman lopi a kihai bawl gawpna cihte zong bei ta hi. Kawlte paunak ah , ” Nang na hoih leh kei zong sia lua lo hing “ a cih bangin mit hek ki en giaugiau hun ahi hi. Thuman lopi a kimawhsakna le kigensiatna cihte zong kideih nawn lo hi. Thuman na le cihtakna cihte pen a zom suak zote mah a tawpna ah lawhcing veve uh hi. Thuman thutak a gum ngamte mah a ma khangah thupha a sang pah kei zongin a ta a tu khang ah thupha ngah hamtang uh hi. Paunak LST sungah “thumanna in minam minthangsak a mawhna in minam mindai sak “ ci hi.(Paunak. 14:34 ). Tua a hih manin thuman thudik pen tuhun thak in hong kalh bek hi loin, a tawntung a i nuntakpih ding Pasian hong deihsak thu a hi hi.

4. Kipahtawi Siamna: Pasian pen a pahtawi tak leh a phattak Pasian ahi hi. Pasian i pahtawi i phat ciangin a ma hihna zah tawh kiphat ahi hi. A hi hangin phat ta kei leng zong a Pasian hihna leh a vangliatna tawm bek kiam lo ding hi lel hi. Tua mah bangin mihngte zong Kigensiat leh kineubawlna sangin kipahtawi siam leng kua mah kiheh lo hi. Naupang khat nangawng phat in pahtawi leng lungdam thei hi. I hihna zah val akigenna,kipahtawi gawpna leh kiphatgawpna te pen kisimmawhna suak kha thei hi. Gam khangtote ah kipahtawina cih pen thupisak mahmah uh hi. Leitung ah mipil, mihau, na hoih sem mi minthangte kipahtawina ahi Nobel Prize a kipiate zong a pahtawi huaite mah a kipahtawi hi mawk hi.

Tuhun thak sungah Zomite a pil a siam, ahau tampi kibehlap mahmah a tua bang mite i pahtawi ding kisam hi. Tuhun pen kihazatna, kigensiatna leh kinen niam hun hi loin, kipahtawina leh kilapsang hun ahi hi. Kipahtawisiamna pen khantohna lim khat mah ahi hi. Mihingte pen i hihna bangin kipahtawi siam leng kipicing zaw leh kipuahto semsem in kitahhat semsem zaw lai hi. LST in, “a lungdamte tawh lungdam khawm un!” a cih pen kipahtawisiamna sungah kihel ahi hi.

I Zomi sungah a thusiam leh akizen zo hi leng pahtawi huai tampi-i nei ta hi. Tuhun thak ah Media and Information Technology(IT) lamah madawk mipilte leh ZONET cihte,Lai nasepna lam ah ZCLS,ZOLUS leh khatsim laihawm pawl khat, kalsim laihawm pawlkhatte zong a pahtawi huai tampi om hi. Hih te pen minam bup min tawh pia pah ding cihna hi loin, a kisaina munmun tawh kizui-in piak ding kisam hi. A pahtawi huai madawk mite leh a maute nasepnate pawl khat anuai a bangin kimu thei hi. La leh tumging lamah Pum Khan Cin,Kam Za Tual(Siyan), Cinpi(Lazy Club),Sia David Suum,Sia Tua mung, Lengtong Pauno,Lengtong Kam Khente,Thawn Kham,Cingsante Unau,SiaTS Khai, Zogam Lalpu,VCMang te, Falcon Band, Music production lam ah Minuamsa Video Studio, Kawlgam guiter kidemna pan telngah E Tuang cihte.

Tua banah Leitung pilna, leh biakna lam pan “ Zomi sungah Amaute kua hiam” (Whos who in Zomi) cih tham ding tuni dong a nung i thuap pak zawh nawn loh madawk pawl khat om hi. Pu Mang Tung Nung(Pinlong thukimna laibawl),Pu thuam Hang and Pu Pau Suan(The frist became Christian in Tedim(Zomi), Rev.Vial Nang(The frist ordain Pastor in Teim(Zomi), Dr. Vum Son, Dr.Vum Khaw hau(The Frist Embassador in Zomi) Col.Khen Za mung,Gen.Tuang Za Khai, Capt.Thang Vel( Pilot), Pu Chin Sian Thang(President-ZNC) and UN Spokesman, Rev.St.Hau Go(Founder of ZBC),Rev.Dr.Kam Khaw Thang(The frist Bible Translator in Tedim(Zomi), Rev.Dr.S.Pau Khan En(The First GS of MBC), Rev.Dr. Hau Lian Kham ( Zomite(Tedim) sungah Khanlawhna piangsak pa), Rev.Dr. Do Suan Mung(The Outstanding Bible College in Tedim(Zomi)), Rev.Dr.Cin Do KHam (The frist Pastor and Professor in English people),Rev.Dr.JM.Ngul Khan Pau( GS of CBCNEI,India), Bishop Msgr. Dr.Felix Lian Khen Thang(The Frist Catholic Bishop in Zomi), Rev.Khoi Lam Thang(The frist GS of Bible Society of Myanmar),Rev.Job Thawngno(Laibu tamgelh),Rev.Khup Za Go(Laibu tamgelh),…etc tampi mah i nei hi. I minam ading angtan huai panmun thupi hong ngah te hi-in Pasal Pha pahtawina minam bup min tawh apiak huaite mah ahi uh hi.

Hih i Zomi madawkte sung pan Pu Chin Sian Thang(President-ZNC) pen Zomi min bek tawh hi loin Kawlgam bup dinmun(National Level) tawh Gam leh nam Kilemkikna ding nasem galhang pahtawina (National Reconciliation Hero Award) pen minam it 88 sangnaupangte leh Norway a om Zomi makaite hanciamna tawh Feb.14,2009 ni-in Oslo khuapi,Norway ah pahtawina thupitak kipia hi. Hih pahtawina sum leh paite sangin, athu mahmah kithupisak zaw ahi hi.

Mai lamah ei sangin khangthak mipil misiam hong om zel ding uh hi. I phakzawh lohte haza leh elbawl loin thapia leh tawsawn a i pahtawi siam ding kisam ding hi. A beisa leh tuhun thak sungin Zogam,Kawlgam sung bek hi loin, gamdang atung Zomite zong mipil, misiam khangthak pahtawi huai tampi mah om ta ahih manin, tua bang mite pahtawi theih ding kisam hi. Kipahtawisiamna in hanciam nopna lungsim khangsak a, picinna leh ki-itna thahat sak semsem hi. Kipahtawisiamna pen khantohna lim khat hi- in hunthak in hong kalh gige khat ahi hi.

5. A kilekkim Nuntakna: Pasian in mi khempeuh a kilekkim/liangko kikim nuntakna nei ding deih hi. Tuma kum 150 lai in America president Mr.Abraham Lincoln in America gamah “To leh Sal” kineihna beisak in kikhelna lianpi khat piang sak hi. Tua kideidanna hangin US leilu lam (North America) leh leitaw lam(South America) kitam khamin, phel nih suak ding kim lai, a ma hangin a kilomkhawm gam(United State) a piang thei ahi hi. Tuni ciang US president 44 ciang dong a om hangin Abraham Lincoln mah ki-it pen leh kizahtak pen in a mah phawkna Innpi(Memorial National Hall)te leh US Kumpi Innkangpi(The White House) te kilam gimgem hi. Mr.Obama in US kumpi tokhom a luah ni January 20,2009 n-in a thugenna ah, ” Pasian kamciam ahi mi khempeuh nuntak kikimna hun thak hong tung taktak ta hi” ci-in US gammi 200000 kim maiah pulak khia hi. Hih kideidan hun beisakna pen vantung gam lim taktak hi-in mikangte in Earthly paradise ci zawzen uh hi.

Pasian in mihingte a ma lim le melsun a hong bawl ahih mah bangin khat leh khat Kiet neu, kisimmawh ding hi loin mihing pen mihing bang a kimuh theih ding thupi hi. Mihingte nuntakna pen Pasian in a hun zui-in hei diamdiam a, a masate nunung zelin , a nunungte masa zel hi. Khangluite in, ” Tagah khuasuak” a cih bangin Abraham Lincoln , Obama leh mi minthng pawl khatte tagah inn sung pan Kumpi inn sung a tung vive te ahi uh hi. Pasian in mi khempeuh tungah nitang guahtui a kibang in pia khawm hi. I Zo paunak ah, ” Sim sing pak zelin, Zo sing paak zel” a cih bangin a gentheite genthei den loin, a nuamsate nuamsa den lo cihna hi mawk hi. Nuntakna pen kilumlet den ahi hi. Khuamial a om bangin khuavak om kik zel hi. Ei hun hong tun laitak in midangte simmawh huai het lo hi.

Tuhun laitak a i minam sungah mihau, mipil, le mi thupite en kik leng hunkhat lai a tualniam mahmah mite hi nuam diak uh hi. Mi thupi khat suahna dingin hanciamna kisam masa pen hi. US president Mr. Obama mahin , ” Mi khempeuh in suahtakna nei ciat uh a, a mau lunggulhna tantan lungkimtak septheih bawltheihna ding hamphatna(Right) nei uh hi.Tua thute mah nuntak pih a, i sepkhiatna ding hun hong tung ta hi” ci-in Kumpi a suah ni-in pulak khia hi. Tua banah ” America gam pen asem ngam mite, a kuan khia ngam mite leh lauhuai phial ta leh a diang khia ngam mite tuallenna mun hi” ci-in mihing suahtakna (Human Rigth) limgen mahmah hi. Tua mah bangin Liangko kikim a thupisak gam khangtote ah nupa kikal leh tate tawh kikal nangawn ah kitot/kivuakna cihte om thei het lo hi. Zi le tate na sat khak le kumpite in thusitna /thukhenna nei pah lian uh hi. Tate zong kum 18 a phak nak leh inntuan sak thei a, a mau leh amau nungta thei uh hi. Tate in Nu le pa vaak cih bang om loin, a teek ciangin Kumpi in kem lel hi. Ganhing khat nangawn kisat/ kibawlsia thei lo hi. Tua pen suahtakna thupisak lua cihna ahi hi.

Tua hi-in hih hunthak sungah mihaute bek maipha a pia mimal, khua leh kipawlna tuamtuamte pen sawt nuamsa thei lo uh hi. A haute hau luain a zawngte zawng lua cih pen Pasian deihna zong hi het lo hi. Tua mah bangin a haute bek kimaiet , kipawl bawl luailuai in a zawngte kisimmawh bawlnate pen Zomite sung pan hepkhiat hunta hi. Hih pen namneu leh sila lungtang neihna ahi hi. Sila le To kineih zia nuntakna pen Zomite neih ngei zong hi lo hi. Paunak khat ah, ” Nang na hong seppih khempeuh hong mai et leh na Sila hi loin, na kamsawl theih khempeuh zong , Sila, nasem, Saal hi lo hi. Huh tuak leh panpihtuak hongsa hi lelin nang kiangah TOKAI hi ngei lo hi ” a cih khat pawk huai mahmah ding hi. Hih To leh Saal lungsim pen hunkhat lai a kipan i gam i lei zui-in hong kipattah khialna khat hikha ding hi. Tua ahih manin hunthak sungah Zomite a hau, a zawng kideidannate hemkhia in lungsim zaipi tak tawh hunthak sungah i kalsuan hun ta hi. Kideidanna hemkhia a, nuntak kikimna/ a kilekkim nuntakna i neih ding hunthak hong kalh thu ahi hi.

6. Nasep hoih sep hun: Mihing khat in leitung ah i Kha a ding Jesu Khrist lungdamna thupha(Christ Gospel) i neih khit ciangin pumpi a ding Ci le sa lungdamna thu(Social Gospel) cih khat i neih loh a phamawh ahi hi. Thu um mikhat nuntakna pen ei a ding bek hi loin, midangte a ding/Jesu a ding nuntakna ahi hi. Gamkhangtote in hih midangte itna, huhna le panpihna cih pen thupisa mahmah uh hi. Leitung ah mihau a tamzawte in mizawngte huhna phualpi(Foundation) nei ciat mawk uh hi. Hih pen mihing a piankhiatna i manphatna taktak ahi hi. Mihing khat nuntakna pen kum 60-70 hi lel in khang khat nuntakna hangin khang tampi a kimang ding na hoih sep huai hi. Nang sih khit ciangin asi ngei lo ding leh a om den ding nasep kul hi. Mi pawl khatte in amah bek nuamsa ding a hanciam om thei hi. Kihuh cih tahdah ama sangin ahau zaw khat om leh hazat ding, gensiat ding leh suksiat ding peuh kihanciam zaw thei hi. Hih bang lungsim pen tuhun ah kizang thei nawn lo hi.
Leitung ah biakna khempeuh in” Na vawh bangin na at kik ding hi” (Gal.6:7-8)) thuhilhna kinei ciat hi. Zogam lasa siam Lengtong Pauno in, ” Nang tung hong bawl ding na deih bangin midangte tungah bawl in”(Matt.7:12) cih pen tuhun tawh kituak mahmah hi. Mi na huh leh nang sihkhit ciangin na ta na tute na kihuh ding hi. Tuhun pen Sum hau hih sangin mihau(mi neih) hun ahi hi. Sanggam U le naute bek hi loin, i theih ngeiloh mite nangawn huhna pen minam itna le Pasian itna taktak ahi hi. I minam sungah mizawng genthei pawl khat laipil mahmah na pin a huh ding a neih loh manin, manawt zolo sangnaupang tampitak om hi. Tua mah bangin minam le gam le Pasian a ding na hoih sem khia a, sum leh pai huhna kisam mipil, misiam leh minam vei Pasian nasem tampi om hi. Tua bang mite gensiat lam bek bek sangin huh le panpih pattah hun ta hi.
Zomite leitung muntuamtuam ah sum le paii zongin i kizel hi. I ngah sum le pai tawh ei kia nopsak ding bek hi loin, u leh nau khua le tui, i gam i lei leh Pasian minthanna ding i zat siam ding mangngilh ngei kei ni. US President Mr.Obama in, ” America gam bang cia zai cih thupi masa lo a, i gamin bang sem khia a, nasep neilote nasep guan in, midangte i huh i panpih hiam cih thupi pen hi” ci-in gen hi. Tua zah khop in gamzawng, mizawngte pahpih le huh ding cih pen US te lungtuppi hi mawk hi. Tua hang mahin America gam pen gam hau pen leh akhangto pen in minthang hi. Pasian thupha sang semsem lai ding uh hi. Tua hi-in kihuh kipanpihna leh nahoih sepna kisin phat huai mahmah hi. Midangte a ding nuntakna cih pen Pasian deihna hi bek tham loin hunthak hong kalh thu ahi hi.

7. Kipawlsiamna: Mihingte pen mel leh sa lungsim ngaihsutna leh duh leh deih a kibanglo vive ahi hi. Tua mah bangin nuntak khuasakna-ah Pasian hong piak pilna, siamna tuam ciat kinei hi. I pilna, siamna te kisimmawhsak loin ama mun ciatah zatsiam ding kisam hi. Kipawlna tumatuamte ah a kibang lo vive kigawm ahih manin, sepkhopna le kipawlsiamna haksa thei hi. Khangluite in, ” Sim beng zong kim citciat tangzang kiguang” a cih bangin Pasian in a makai ding mi pawl khat koih den hi. Tua ahih manin Tuhun pen Ngalkhaat bang a tangtat hun hi loin, kipawlkhop hun le sepkhop hun ahi hi. Tuhun thak ah mite pil semsem in kipawlsiamna thupisak semsem uh hi. I Zopaunak ah, ” Neek khawm lim, puak khawm zang,Sepkhop liau” a cih bangin sepkhop kipawlkhopna ah matutna om hi. Zomite pen vai khat peuh ah a kipawl thei lo hiloin, a kipawl siam nai lote hizaw hi hang. Tu banah akikhen tham ding minam zong i hih zo nai kei a, ZOMI min nangawn a kipsak / a bullet ngam nai lote i hi lai hi. Kipawlna khat peuh a kisiat khak zelna bulpi pen makaih pilna leh nungzuih siamna kinei loin, kihawmthawhna tawh kisiatna piang ahi hi. Makai cih ciangin vai khempeuh a buplak loin hawm dimdiam ding cihna a hi hi. Vaihawm ding bek hi a, thukhensat/ thuzeek(Executive) ding hi lo hi. Zomi sungah makai siam i kisap mah bangin nungzui siam zong a kisam i hi hi. Zomite pen i mimal in kihat, kipil leh kisiam na pin, kipawlkhop kisiam lo citciat hi.

Tuhun pen leitung bup huam nasepna(Globalization) vive tawh nasep khop hun hi mawk hi. Hih bang a kipawlsiamna dingin lungsim zaipital/ Nampi lungsim (Nationalism) neih kul a, Lungsim toi/namneu lungsim(Tribalism) hepkhiat ding kisam hi. Kamdang in gen leng Nampi lungsim i neih theih ma tengin kipawlsiamna nei thei lo ding cihna ahi hi. Minam bup kipawlsiamna i gengen lai takin beh leh phung, khua leh tui, leh pawlpi vai nengneng te tawh ih buai luat ciangin Zomibup kipumkhatna leh nasepkhopna ding susia hi. LST sungah kipumkhatna thupha(Late.133:1-2) thupitak na gen hi. Leitung mun tuamtuam USA,UK,Norway,Germany,Sweden,Denmark, Italy, Canada, Australia, Japan,Singapore,Korea,China, Malaysia,Thailand,India cihte a Zomite leh Kawlgam lam pan kawlpi-Tahan, Tedim,Tonzang, Falam,Tamu, Yangon,Mandalay, Cikha leh Lamka(Manipur) lam ate tawh vaihawmk hawm a,Leitungbup Zomi Kipawlna (Global Zomi Organization) lianpi khat i neih ding hun ta hi., Hih bang kipawlkhopna pan Zomi Social Gospel cihte ahi Development Program leh Zomi Culture and Literature Committee cih bang zong thupitak neih ding kisam mahmah hi. Tua banah Zomite pilna lam ah i khantoh zawkna dingin mipil M.Phil, D.Litt, leh Ph.D. 500-1000 i neih ding kisam masa loin, Pilsin zia (Education System)te zonbeh a, Mipibup Laitheihna Nasep(Total Literacy Mission) lam panlak huai masa zaw hi hang. Tua hi-in hunthak sungah i ngaihsutna mahmah kibangsak in, a kilomkhawm lungsim ( United Heart) tawh sem khawm leng pangkhawm hatna(Unity is Strength) hong piang ding a, tua panin gualzawhna( Successful) kingah ding ahi hi. Zomite nampi lungsim nei a, mai lamah leitung buppi huam a nasepkhop siam leh a kipumkhat semsem ding i lametna hisak lai ding hi hang.

Thukhupna: Khuahun luan zia zui-in ngaihsutna le nuntak khuasak zia i khel ding kisam mahmah hi. Mi khempeuh in suakta tak a i lunggulh tantan lungkimtak septheih bawl theihna ding hamphatna kinei hi. Tua thute mah nuntakpihna leh kipawlkhopsiamna tawh lawhcin theihna ding hunthak sung a lut ta ihi hi. Hunthak in hong kalh thute i maituah zawhna dingin kikhelna, pilna le siamna, thuman thudik, liangko kikim nuntakna,leh Kipahtawisiamna tawh nampi lungsim nei-in a kipawlkhawm thei leng a khangto Pasian zat Thupha ngah Zomi namte i suak thei pan bek ding hi. A thupi mahmah khat ah hun thak sungah sunmang(Vision/Dream) limci neih ding kisam a, tua bang sunmang na neih kei leh nisim naisim a kikhel den i leitung in nang hong paisan den ding a hi hi. Khantohna le lawhcinna taktak pen a hunzui a nuntak simna hi-in hunthak tawh a kituak mahmah zong hipah hi. Lasim mimal kim tungah Hunthak tawh kimaituah siam ding leh a nungta siam dingin Topa Pasian in thupha hong pia hen.

Minam ading deihsakna tawh,
Sia Khampeek

Tongsan Pu

Norway

Advertisements

Posted in Articles | Tagged: , | Leave a Comment »